NDAI masha ni gaw Yesu a hpang hkan ai ni rai ma ai. Yesu a ga madat nna Yerusalem mare kaw e nga nga ma ai. Shanhte yawng la nga ma ai shaloi kadu ai nsen kaba nta ting hpring mat wa ai. Nbung laru hte bung ai. Bai nna wan shinlet sape shagu a baw e jung nga ai. Shanhte langai hte langai a ntsa wan du nga ai hpe mu a ni? Ndai gaw hpa lachyum re ai hpe chye a ni?

Ndai gaw mauhpa kum la langai re. Yesu gaw shi a kawa nga ai sumsing lamu de du wa nna shi a hpang hkan ai masha ni a ntsa e, Karai Kasang a Chyoi pra ai wenyi ru jaw nga ai. Dai Chyoi pra ai wenyi gaw shanhte hpe hpa galaw wa hkra shabyin dat ai hpe chye a ni? Shanhte yawng ga amyu myu tsun shaga wa ma ai.

Yerusalem masha ni law law nbung laru kaba zawn re ai nsen hpe na jang, hpa byin ai kun? nga ana sa yu ma ai. Dai masha ni hta Israela masha ni a Pentikoti poi sa ai kaga amyu ni mung lawm ma ai. Mare na manam ni mau mat ma ai. Karai Kasang galaw ai laklai amu ni a lam hte seng nna sape ni gaw shanhte a ga hte tsun shaga nga ma ai hpe kaga masha ni na la ma ai.

Manam ni gaw, ‘ndai ni Galile masha hkrai rai ma ai. Dai rai yang anhte nga ai mungdan na aga ni hpe kaning rai tsun shaga lu ai kun?’ nga ma ai.

Ya Petru rawt tsap nhtawm, shanhte hpe tsun shaleng dan ai. Yesu hpe masha ni kaning rai sat kau ai lam, shi hpe Yehowa jahkrung sharawt dat ai lam hpe, nsen shaja let tsun dan ai. ‘Ya Yesu gaw sumsing lamu de du wa nna Karai Kasang a hkra maga de dung nga sai,’ nga nna Petru tsun ai. Bai nna ‘Yesu gaw ga sadi hte maren, Chyoi pra ai wenyi hpe ru jaw dat sai. Dai majaw ndai mauhpa lam ni hpe nanhte na lu mu lu nga ai re,’ nga nna tsun dan ai.

Petru gaw shing nga nna tsun dat jang masha ni gaw Yesu hkrum kadup ai lam ni a majaw grai myit yawn nga ma ai. ‘Anhte kaning rai galaw na rai ta? nga nna san ma ai. Petru gaw: ‘Nanhte a ngasat ngasa lam ni hpe galai kau nna, hka lup hkam la mu,’ nga nna htan ai. Dai rai nna dai shani e, masha 3,000 hka lup hkam la nna, Yesu a hpang hkan ai masha ni tai wa ma ai.