EBʼ LI wankebʼ saʼ li eetalil aʼanebʼ li xtzolom li Jesus. Ebʼ li xtzolom li Jesus chʼutchʼuukebʼ saʼ li tenamit Jerusalen chanchan xyaabʼ kawil iqʼ kinujak saʼ li ochoch. Chirix chik aʼan, kixkʼe ribʼ li ruʼuj raqʼ xaml saʼ xbʼeenebʼ li xjolom chixjunqalebʼ. Ma nakaawil li xaml saʼ xbʼeenebʼ? Ma nakaanaw kʼaru xyaalal?

Aʼin jun chik li sachbʼachʼoolej kixbʼaanu li Jesus. Naq li Jesus kixtaqla li santil musiqʼej saʼ xbʼeenebʼ li xtzolom, ak wank wiʼ chik saʼ choxa rikʼin li xyuwaʼ. Ma nakaanaw kʼaru keʼok xbʼaanunkil naq keʼxkʼul li santil musiqʼej? Chixjunilebʼ keʼok chi aatinak saʼ jalan jalanq chi aatinobʼaal.

Ebʼ laj Jerusalen keʼchalk chi rilbʼal ebʼ li xtzolom li Jesus, xbʼaan naq keʼrabʼi li kiʼeekʼank chaq saʼ li ochoch. Wankebʼ keʼchalk saʼ jalan chik tenamit saʼ li xninqʼehebʼ laj Israel, Pentecostes xkʼabʼaʼ. Sachsookebʼ xchʼool keʼkanaak ebʼ li qas qiitzʼin! Ma nakaanaw kʼaʼut? Xbʼaan naq ebʼ li xtzolom li Jesus yookebʼ chi aatinak saʼ li raatinobʼaalebʼ chirix li Yos.

Ebʼ li wankebʼ Jerusalen keʼxye: ‹Chanru nekeʼru chi aatinak saʼebʼ li aatinobʼaal bʼarwiʼ nokoochalk? Aʼanebʼ aj Galilea!›

Laj Pedro kiʼok xchʼolobʼankil chiruhebʼ chanru keʼxkamsi li Jesus ut naq li Jehobʼa kixwaklesi wiʼ chik chi yoʼyo. Joʼkan naq laj Pedro kixye: ‹Li Jesus wank saʼ choxa saʼ xnim ruqʼ li Yos. Ut aʼan kikʼehok re li santil musiqʼej saʼ xbʼeenebʼ li xtzolom. Joʼkan naq kikʼulmank ebʼ li sachbʼachʼoolej›.

Naq laj Pedro kiraqeʼk xyeebʼal aʼin, naabʼalebʼ keʼyotʼeʼk xchʼool chirix li Jesus ut keʼxye: ‹Kʼaru tento tqabʼaanu?› Laj Pedro kixye rehebʼ: ‹Tento naq teejal leenaʼlebʼ ut teesubʼ eeribʼ saʼ haʼ›. Saʼ li kutan aʼan 3.000 tana keʼxsubʼ ribʼ saʼ haʼ ut keʼkanaak choʼq xtzolom li Jesus.