ANDŨ aya ũrona nĩ arũmĩrĩri a Jesu. Nĩ maamwathĩkĩire na magĩikara o kũu Jerusalemu. Na rĩrĩa metereire marĩ hamwe othe-rĩ, mũgambo mũnene ũkĩiyũra nyũmba yothe. Waiguĩkaga ta rũhuho rũkĩhuhũkania na hinya mũno. Hĩndĩ ĩo nĩmĩ ciatariĩ ta nĩnĩmbĩ cia mwaki igayũkanĩte igĩikara igũrũ rĩa ciongo cia arutwo acio. No wone nĩnĩmbĩ icio he mũndũ o mũndũ? Ũndũ ũyũ-rĩ, nĩ ũrĩkũ?

Kaĩ atarĩ kĩama! Jesu nĩarĩkĩtie gũcoka igũrũ matu-inĩ kũrĩ Ithe, na nĩ araitĩrĩria arũmĩrĩri ake roho mũtheru wa Ngai. Wee nĩ ũũĩ roho ũyũ waatũmire meke atĩa? Othe maambĩrĩirie kwaria na thiomi ng’eni.

Andũ aingĩ thĩinĩ wa Jerusalemu nĩmaiguire inegene rĩatariĩ ta rũhuho rũnene, na magĩũka kuona nĩ atĩa gwekĩkaga. Andũ amwe ao moimĩte kuuma ndũrĩrĩ ingĩ nĩũndũ wa gĩathĩ kĩa Aisiraeli gĩa Bendegothito. Na kaĩ ageni acio nĩmonire ũndũ wa mageganiaĩ! Maiguire arutwo makĩaria na thiomi ciao ũhoro wĩgiĩ maũndũ ma magegania marĩa Ngai ekĩte.

Ageni acio makiuga atĩrĩ: ‘Andũ aya othe moimĩte Galili, na nĩkĩ gĩgũtũma mahote kwaria na thiomi ici ii ngũũrani cia mabũrũri marĩa tuumĩte ithuĩ?’

Petero akĩrũgama kũmataarĩria. Aanĩrĩire na mũgambo mũnene akĩĩra andũ ũrĩa Jesu oragirũo na atĩ Jehova nĩ amũriũkĩtie kuuma kũrĩ akuũ. Ningĩ Petero akiuga atĩrĩ: ‘Rĩu Jesu arĩ igũrũ guoko-inĩ kwa ũrĩo kwa Ngai. Na rĩu nĩ aitĩrĩria arutwo ake roho mũtheru ũrĩa eeranĩire. Na nĩkĩo muona na mwaigua ciama ici.’

Rĩu-rĩ, hĩndĩ ĩrĩa Petero oigire maũndũ maya-rĩ, andũ aingĩ makĩigua kĩeha mũno nĩũndũ wa ũrĩa Jesu ekĩtwo. Makĩũria atĩrĩ, ‘Tũgwĩka atĩa rĩu?’ Petero akĩmeera atĩrĩ: ‘Mwagĩrĩirũo nĩ kũgarũra mĩthiĩre yanyu na mũbatithio.’ Kwoguo mũthenya oro ũcio andũ ta 3,000 makĩbatithio na magĩtuĩka arũmĩrĩri a Jesu.