ABO bantu bo ubena kumona pa kikye kipikichala ke baana ba bwanga ba kwa Yesu. Bamukokejile ne kwikala mu Yelusalema. Byo bakipembelejilenga bonse pamo, kwaumvwanyikile kilulumo kyakumbene nzubo yonse. Kino kilulumo kyaumvwanyikile nobe luvula mukatampe ubena kupupa. Ponkapo kwibamwekejile njimi kasa yaabana, nobe mujilo; yaikajile pa bonse baana ba bwanga pa muntu pa muntu. Nanchi wamumona mujilo peulu ya muntu umo umo nyi? Kino kilumbulula ka?

Kyajinga kya kukumya! Yesu wabwelele mwiulu mwi Bashanji, kabiji waitulwile mupashi wazhila wa Lesa pa baana banji ba bwanga. Nanchi wayuka uno mupashi byo ebalengejile kuba nyi? Bonse batendekele kwamba mu njimi yapusana pusana.

Bantu bavula mu Yelusalema baumvwine kilulumo kyajinga nobe luvula mukatampe ubena kupupa. Kino kibalengejile kwiya na kumona kyaubiwenga. Bantu bamo bafumine mu mikoka ikwabo ne kwiya na kutanwa ku kijiilo kya bena Isalela kya Pentekosita. Bano benyi bakuminye bingi! Baumvwinenga baana ba bwanga saka bamba mu milaka yabo pa mambo a bintu byawama byauba Lesa.

Bano benyi baambile’mba: ‘Bano bantu bonse bena Ngalilea. Mambo ka ne atweba bonse, pa muntu pa muntu, ke tumvwe mu milaka yetu yo twasemenwamo?’

Kepo Petelo aimene ne kulumbulula kwi abo. Waambile na jiwi jasansuka ne kubula bantu pe Yesu byo bamwipayile, ne kuba’mba Yehoba wamusangwile mu bafu. Petelo wabwelele waamba’mba: ‘Yesu uji ku kilujo kya Lesa. Kabiji wapana mupashi wazhila ye alayile. O ene mambo o mwamwena ne kumvwa bino bya kukumya.’

Petelo byo aambile bino byambo, bantu bavula baumvwine bingi bulanda pa byaubilwe kwi Yesu. Kepo baipwizhe’mba: ‘Tube byepi?’ Petelo wibambijile’mba: ‘Mwafwainwa kupimpula bwikalo bwenu ne kubatizwa.’ Onkao mambo, pa jonkaja juba, bantu 3,000 babatizwe ne kwikala baana ba bwanga ba kwa Yesu.