Esimwititi 105: Endindiro moJerusarema
VANTU ava apa kuna kara vasikuli vaJesus. Awo vana mu limburukwa yiyo vana kara ngorooro moJerusarema. Ano posiruwo oso vana kundindira navenye kumwe, muhagaro gomunene tagu zwida embo nalinye. Ago kuna kuhagara ngwendi ekundungu. Makura maraca gomundiro taga moneka pomutwe gwankenye murongwa. To mono mundiro ogo guna kara peguru lyankenye gumwe? Yinke yina kutanta nayinye eyi?
Aso sitetu! Jesus ana tengura meguru koGuhwe, makura yiyo ana kupowomwena mpepo zaKarunga zokupongoka povasikuli vendi. Ono diva asi yinke zina va ninkisa mpepo ezi va rugane? Navenye tava tameke kuuyunga maraka gokulisiga-siga.
Vantu wovanzi moJerusarema tava zuvhu ezogerero lyomuhagaro ogu ngwendi ekundungu, makura tava wiza va ya tare asi yinke yina kuhoroka. Vantu vamwe wokonomuhoko nadopeke vana wiza oku kosipito soVaisraeli soPentekoste. Ee, sitetu musi vana ya gwana vadinguli ava! Awo tava zuvhu varongwa tava uyunga maraka gavene kuhamena yininke yoyiwa eyi ga rugana Karunga.
Vadinguli tava tanta asi: ‘Vantu ava navenye womoGalireya. Ngapi omu vana kuvhura kuuyunga maraka gokulisiga-siga gokoyirongo eyi twa tundilira?’
Peturusa makura ta sikama a va fatwilire. Ta zahura ezwi lyendi nokutantera vantu asi ngapi Jesus omu va mu dipagere, ntani nomu Jehova ga mu pindwire koufe. Peturusa ta tanta asi: ‘Jesus ngesi mweli meguru korulyo rwaKarunga. Ano yige ana powomwene mpepo zokupongoka ezi ga tumbwidilire. Eyi yiyo muna kumonena nokuzuvhira yitetu eyi.’
Apa ana kutanta Peturusa yininke eyi, vantu wovanzi tava livere kuhamena yininke eyi va rugene Jesus. Tava pura asi: ‘Ngapi omu natu rugana?’ Peturusa ta va tantere asi: ‘Mwa kona kupirura maparu geni nokumukuhwa.’ Mezuva lyoolyo vantu wokusika po-3 000 tava va kuhu nokukara vasikuli vaJesus.
Yirugana 2:1-47.
Mapuro
- Moomu lina kuyilikida efano, yinke yina horokere kovasikuli vaJesus owo vana ndindire moJerusarema?
- Sitetu musinke vana gwana vadinguli koJerusarema?
- Yinke ana kufatwilira Peturusa kovantu?
- Ngapi omu vana lizuvhu vantu konyima zokupurakena kwaPeturusa, ntani yinke ana va tantere va rugane?
- Vantu vangapi vana gwana ekuho mezuva lyoolyo lyoPentekoste, 33 S.N.?
Mapuro gokugwederera ko
- Resa Yirugana 2:1-47.
Nonkango daPeturusa domoYirugana 2:23, 36, ngapi omu adi likida asi muhoko nagunye goVajuda kwa lihamekere mo monomfa daJesus?
Ngapi omu ga tulire po Peturusa sihonena sosiwa sokufaturura Matjangwa?
Ngapi omu ga ruganesere Peturusa nsapi zopomuhowo ‘zononsapi doUntungi weguru,’ edi ga mu tumbwidire Jesus?
