MPANJI 105

Kutalila muYerusalema

AWANTU adi hanu diwu atumbanji twaYesu. Anamwovwahili nawa anashakami muYerusalema. Hampinji yadiñawu wejima wawu nakutalila, lushindu lweneni hilukwinzesha itala dejima. Hilukutiyakana neyi mpepela yeneni yikukunka. Dichi nyizuzu yakesi hiyikumwekana hanyitu yawatumbanji ejima. Wunakimoni kesi kadi hanyitu yawudi wejima? Yuma yejimiyi yinakulumbululadi?

Hichihayamisha! Yesu wafunta dehi mwiwulu wudi naTata yindi, nawa nakwichila spiritu yajila yaNzambi hadi atumbanji twindi. Wuneluki chuma chinayileteshi iyi spiritu kwila? Wejima wawu hiyakutachika kuhosha mumadimi ashiyashana.

Antu amavulu muYerusalema anatiyi lushindu lunatiyakani neyi mpepela yeneni, dichi hiyakwinza nakutala chuma chinakuzatika. Antu amakwawu anafumi kunyunza yacheñi anenzi kunu kuchawija chawaIsarela chaPentekosta. Awa enyi ochahayaminiwu hayuma yamweniwu! Hiyakutiya atumbanji anakuhosha mwidimi dawu aweni hayuma yabadika yinakoñiyi Nzambi.

Enyi hiyakuhosha nawu, ‘Awantu ejima afuma muÑaliliya. Indi chinekali ñahi hakwila nawu atweshi kuhosha mumadimi ambuka akumatuña acheñi kutwafumetu?’

Petulu hakwimana nakuyilumbulwila. Hakukolesha izu dindi nakuyileja antu chamujahiliwu Yesu nichamusañwiliwu kudi Yehova kufuma mudi afu. Petulu hakuhosha nindi, ‘Ichi Yesu wudi mwiwulu kuchikasa chachiidilu chaNzambi. Nawa nechili dehi spiritu yajila yakaniniyi. Dimuloña waweni yimunamweni nikutiya iyi yihayamisha.’

Chelili Petulu yahoshi yumiyi, antu amavulu hiyakuneña chikupu hachuma chamwililiwu Yesu. Hiyakwihula nawu, ‘Tukwiladi? Petulu hakuyileja nindi: ‘Mwatela kuhimpa nshakaminu yenu nakupapatishewa.’ Dichi hanodu ifuku kwakwihi nawantu 3,000 hiyakupapatishewa nakwikala atumbanji twaYesu.

Yililu 2:1-47.