NA̱ YIVÍ yóʼo kúú na̱ ndíku̱n sa̱tá ta̱ Jesús. Ta ñuu Jerusalén ñúʼuna chi ka̱ndíxana ña̱ ni̱ka̱ʼa̱n ta̱ Jesús xíʼinna. Tá ñúʼu ndiʼina veʼe kán iin kama ni̱ni̱ʼi. Tá ku̱u ni̱ya̱ʼa iin ta̱chí ndeé saá ku̱u. Koto nu̱ú na̱ʼná yóʼo, vitin kána iin ñuʼu̱ xi̱ní iin iinna. ¿Ndáaña kúni̱ kachi ña̱yóʼo?

Iin milagro kúúña. Vitin íyo ta̱ Jesús xíʼin Yivára chí ndiví, ta ta̱xira espíritu yi̱i̱ Ndióxi̱ ndaʼa̱ na̱ ndíku̱n sa̱tára. ¿Á xíni̱ún ndáaña ke̱ʼéna i̱xaa espíritu yi̱i̱ yóʼo? Ndiʼina ki̱xaʼána káʼa̱nna inka tu̱ʼun.

Ku̱a̱ʼání na̱ yiví na̱ ñuu Jerusalén xi̱niso̱ʼona ni̱ni̱ʼi nda̱a̱ tá ku̱u ni̱ya̱ʼa iin ta̱chí ndeé saá ku̱u, ta va̱xina kunina ndáaña ku̱u. Sava na̱ yiví ke̱ena inka ñuu ta ki̱xa̱a̱na ndasakáʼnuna vikó ña̱ kéʼé na̱ ñuu Israel ña̱ naní Pentecostés. Nda̱kanda̱kaví-inina. Saáchi na̱ discípulo ki̱xaʼána káʼa̱nna tu̱ʼun mií na̱ yiví yóʼo xa̱ʼa ña̱ ke̱ʼé Ndióxi̱.

ʼNdiʼi na̱yóʼo chí ñuu Galilea ke̱ena, ¿ndachun va̱ʼaní káʼa̱nna tu̱ʼunyó?ʼ, káchina.

Ta̱ Pedro nda̱kundichira ta ki̱xaʼára káʼa̱nra xíʼinna xa̱ʼa ta̱ Jesús ndáaña ke̱ʼéna xíʼinra ña̱ xa̱ʼnínara, tándi̱ʼi Jehová sa̱ndátakura ta̱yóʼo. ʼTa vitin íyora chí ndiví chí ndaʼa̱ kúaʼa Ndióxi̱. Ta ta̱yóʼo kúú ta̱ ta̱xi espíritu yi̱i̱ Ndióxi̱ ndaʼa̱ndi̱. Ña̱kán va̱ʼa káʼa̱nndi̱ inka tu̱ʼunʼ, káchi ta̱ Pedro xíʼinna.

Tándi̱ʼi ni̱ka̱ʼa̱n ta̱ Pedro ña̱yóʼo, ku̱a̱ʼá na̱ yiví nda̱ndikó-ini xa̱ʼa ña̱ i̱xaana xíʼin ta̱ Jesús. ʼ¿Ndáaña keʼéndi̱ vitin?ʼ, káchina xíʼin ta̱ Pedro. Ta̱yóʼo ni̱ka̱ʼa̱nra xíʼinna: ʼVitin xíniñúʼu ndakoondó ña̱ kéʼéndó ta ndakuchindóʼ, káchira xíʼinna. Míí ki̱vi̱ saá ki̱ʼva 3,000 na̱ yiví nda̱kuchi ta nda̱kundiku̱nna sa̱tá ta̱ Jesús.