KO E tau tagata nei ko e tau tutaki ha Iesu. Ne omaoma a lautolu ki a ia ke nonofo i Ierusalema. He fakatali a lautolu auloa, ne puke e fale katoa he leo lahi. Ne leo tuga e matagi kua havili malolō. Ti kamata e tau alelo afi ke kitia i luga he tau ulu he tau tutaki takitokotaha. Maeke nakai a koe ke kitia e afi i luga ia lautolu takitokotaha? Ko e heigoa e kakano?

Ko e mana a ia! Ko Iesu haia mo e Matua haana i luga he lagi, ti kua liligi hifo e ia e agaaga tapu he Atua ke he tau tutaki haana. Iloa nakai e koe ko e heigoa ne omoomoi he agaaga nei a lautolu ke taute? Ne kamata a lautolu oti ke vagahau he tau vagahau kehekehe.

Tokologa e tagata i Ierusalema ne logona e leo ne tuga e matagi malolō, ti o mai a lautolu ke kitia e mena kua tupu. Falu tagata kua o mai he tau motu kehe ki hinei ke lata mo e galue Isaraela he Penetekoso. Kua fakaofo lahi ke he tau tagata ahiahi nei! Ne logona e lautolu e tau tutaki kua vagahau ke he tau vagahau ni ha lautolu hagaao ke he tau mena mitaki lahi ne taute he Atua.

‘Ne o mai e tau tagata oti nei i Kalilaia,’ he talahau he tau tagata ahiahi. ‘Ti maeke fēfē ia lautolu ke vagahau ke he tau vagahau kehekehe nei he tau motu ne o mai ai a mautolu?’

Ne tū hake a Peteru ke fakamaama ki a lautolu. Ne talahau fakaleo lahi e ia ke he tau tagata e puhala ne mate ai a Iesu ti liu fakatu mai e Iehova a ia he mate. ‘Ko Iesu mogonei kua ha ha i luga he lagi he lima matau he Atua,’ he ui e Peteru. ‘Ti kua liligi mai e ia e agaaga tapu ne mavehe. Ko e kakano haia ati kitia mo e logona e mutolu e tau mana nei.’

Magaaho ne talahau e Peteru e tau mena nei, ne tokologa e tagata ne tokihala hagaao ke he tau mena ne taute ki a Iesu. ‘Ko e heigoa ha tautolu kua lata ke taute?’ he hūhū e lautolu. Ne tala age a Peteru ki a lautolu: ‘Lata ia mutolu ke hiki e tau momoui ha mutolu mo e kia papatiso.’ He aho ia ni ne kavi ke he 3,000 e tagata ne papatiso ti eke mo tau tutaki ha Iesu.