Bategyereize Omuri Yerusaalemu
Ekitebyo 105
Bategyereize Omuri Yerusaalemu
ABANTU aba aha n’abakuratsi ba Yesu. Bamworobeire baaguma omuri Yerusaalemu. Kandi ku baba bari hamwe barindiriire, okuhoorera kw’amaani kwijura omu nju. Ni nk’okuhoorera kw’omuyaga gw’amaani. Kandi bwanyima endimi ziri nk’ez’omuriro zitandika kureebeka aha mutwe gwa buri mwegi. Nooreeba omuriro aha mutwe gwa buri omwe? Ebi byona nibimanyisa ki?
N’eky’okutangaaza! Yesu yaahikire omu iguru ari n’Ishe, kandi yaashuka omwoyo orikwera aha bakuratsi be. Noomanya eki omwoyo ogu yaabareetera kukora? Boona baatandika kugamba omu ndimi z’omutaano.
Abantu baingi omuri Yerusaalemu bahurira okuhoorera okwo okuri nk’okw’omuyaga gw’amaani, kandi baija kureeba ekirikubaho. Abantu abamwe abarugire omu nsi ezindi baizire aha bugyenyi bw’Abaisraeli obwa Pentekoote. Aba bagyenyi ka baatangaire munonga! Bakahurira abeegi nibagamba omu ndimi z’owaabo nibagamba aha bintu by’okutangaaza ebi Ruhanga akozire.
Abagyenyi bagira bati: ‘Aba bantu boona nibaruga Galilaaya. Mbwenu kyaruga hi, itwe twena okuhurira nibagamba endimi z’owaitu ei turikuruga?’
Petero hati aimuka kubashobororera. Aimutsya eiraka rye kandi agambira abantu oku Yesu yaitsirwe n’oku Yehova yaamuzoire kuruga omu bafu. Petero agira ati: ‘Hati Yesu ari omu iguru aha mukono gwa buryo rwa Ruhanga. Kandi yaashuka omwoyo orikwera owaaraganisiibwe. Egi niyo nshonga ahabwaki mwareeba kandi mwahurira eby’okutangaaza ebi.’
Mbwenu, Petero ku yaagambire ebintu ebi, abantu baingi baashaasha munonga ahabw’ebyakozirwe ahari Yesu. Baamubuuza bati: ‘Tukore ki?’ Petero yaabagira ati: ‘Nimwetenga kuhindura aha mitwarize y’amagara gaanyu kandi mukabatizibwa.’ N’ahabw’ekyo, omu izooba eryo, abantu nka 3,000 bakabatizibwa kandi baahinduka abakuratsi ba Yesu.
