105 yachachiy

Jerusalenpi suyanku

KAY runasqa Jesuspa discipulosnin kanku. Jesús nisqanmanjina Jerusalenpi suyachkanku. Jukllapi tukuy suyachkaptinku juk jatun chʼaqway wasiman juntʼaykurqa. Sinchita wayrachkanmanjina karqa. Paykunaman nina larwayjina sapa jukpa umanman tiyaykurqa. ¿Umankupi nina larwayta rikunkichu? ¿Imataq chay karqa?

¡Kayqa juk milagro karqa! Jesús watiqmanta Tatanwan cielopi kachkaspa, Diospa santo espiritunta discipulosninman tʼakaykamurqa. ¿Imaynatataq santo espíritu paykunata yanaparqa? Tukuyninku, may chhika simipi parlayta qallarirqanku.

May chhika runa chay sinchi wayrajinap chʼaqwayninta uyarispa, imachus kasqanta qhawaq rirqanku. Wakinkuna karu llaqtasmanta Jerusalenman, Pentecostés raymiman jamurqanku. Paykuna discipulokunata parlayninkupi Diospa ruwasqasninmanta uyarispa. ¡Mayta tʼukurqanku!

Karu llaqtasmanta runakuna nirqanku: ‘Manachu kay runasqa Galileamanta kanku. ¿Imaynata sapa juknichikpa siminchikpi parlayta atinkuri?’, nispa.

Chaymanta Pedro sayariytawan sinchita parlayta qallarirqa. Llakiyta Jesusta wañuchisqankumanta, chantapis Jehová kawsarichimusqanmanta ima; jinata nirqa: ‘Kunanqa Jesús cielopi Diospa pañanpi kachkan. Paytaq niwarqaykujina santo espirituta tʼakamun. Chayrayku kay milagrosta rikuchkankichik’, nispa.

Pedrop nisqanta uyariytawan, runaqa Jesusta wañuchisqankumanta mayta phutikurqa. ¿Imatataq ruwanayku tiyan?, nispa tapukunku. Pedrotaq kutichirqa: ‘Saqra ruwayniykichikmanta kutirikuychik, bautizakuychiktaq’, nispa. Chay pʼunchaypitaq 3.000 runa bautizakuspa, Jesusta qhatiyta qallarirqanku.

Hechos 2:1-47.