E AU pipi teia au tangata na Iesu. Kua akarongo ratou iaia e kua noo ki Ierusalema. E ia ratou pouroa e tiaki ua ra, kua ki te are i tetai maniania maata. Te tangi anga mei tetai matangi ririnui rai. E oti kua kiteaia atu te ai ka i runga ake i te katu o te au pipi tataki tai. Te kite ra koe i te ai i runga ake ia ratou tataki tai? Eaa te aiteanga o te reira?

E temeio te reira! Tei te rangi akaou a Iesu i tona Metua, e te riringi maira aia i te vaerua tapu o te Atua ki runga i tana au pipi. Kua kite koe e eaa ta teia vaerua i maani ia ratou kia rave? Kua akamata ratou pouroa i te tuatua i te au reo ke.

Manganui te tangata i Ierusalema tei akarongo i te maniania mei te matangi ririnui rai, e kua aere mai i te akara e eaa te tupu ra. Tetai pae o te tangata no te au enua ke tei aere mai no te oroa Penetekote a to Iseraela. Poitirere tikai teia au manuiri! Kua akarongo ratou i te au pipi e tuatua ra i to ratou uaorai au reo no runga i te au apinga meitaki ta te Atua i rave.

‘No Galilea mai teia au tangata pouroa,’ i karanga ai te au manuiri. ‘Akapeea i reira ratou i kite ei i te tuatua i teia au reo tukeke o teia au enua no reira mai tatou?’

Kua tu mai i reira a Petero i te akamarama atu kia ratou. Kua tuatua maata aia e kua akakite atu ki te tangata i akapeea a Iesu i te tamateia anga e kua akaora mai a Iehova iaia mei te mate. ‘Teianei tei runga a Iesu i te rangi i te rima katau o te Atua,’ i karanga ai a Petero. ‘E nana i riringi mai i te vaerua tapu tei taputouia. No reira kotou i kite ei e i akarongo ei i teia au temeio.’

I na, te tuatua anga a Petero i teia au tuatua, kua tangi tikai te tangata no runga i tei raveia kia Iesu. ‘Eaa ta matou ka tau kia rave?’ i ui ei ratou. Akakite atu a Petero kia ratou e: ‘Ka anoanoia kotou kia taui i to kotou oraanga e kia papetitoia.’ No reira i taua ra tikai ra, mei te 3,000 tangata tei papetitoia e tei riro mai ei au pipi na Iesu.