AZO so ge ayeke adisciple ti Jésus. Ala mä yanga ti lo na ala ngbâ na Jérusalem. Na ndembe so ala kue abungbi ndo oko ti ku, ala mä go ti mbeni ye so amû yâ ti da ni kue, mo bâ mo tene go ti kota pupu so aya na ngangu. Mo ye ti bâ, amenga-wa ato nda ti duti na li ti adisciple ni oko oko kue. Mo bâ menga-wa so ayeke na li ti azo oko oko so kue? Ye so kue aye ti tene nyen?

So ayeke mbeni miracle! Jésus ague na tere ti Babâ ti lo na yayu awe, na lo yeke tuku yingo vulu ti Nzapa na ndo ti adisciple ti lo. Mo hinga ye so yingo so asara na ndo ti ala? Ala kue ato nda ti sara tënë na ayanga nde nde.

Azo mingi na Jérusalem amä go ti ye so akpa ti kota pupu, na ala ga ti bâ ye so asi. Ambeni na popo ti ala alondo na ambeni ndo nde na ala ga na Jérusalem ndali ti Matanga ti Pentecôte so azo ti Israël ayeke sara ka. Bê ti ala adö mingi ti mä ye so! Ala mä adisciple ni na tenengo yanga ti kodoro ti ala, ala yeke sara tënë ti apendere ye so Nzapa asara.

Awande so atene: ‘Azo so kue ayeke azo ti Galilée pëpe? A sara tongana nyen si ala lingbi ti sara tënë na ayanga ti akodoro nde nde so e londo dä?’

Pierre alondo fadeso ti fa nda ni na azo ni. Na kota go, lo fa na ala tongana nyen a fâ Jésus na so Jéhovah azingo lo na kuâ. Lo tene: ‘Jésus ayeke fadeso na yayu, na lo duti na koti ti Nzapa. Lo si atuku na ndo ti e yingo vulu so lo sara tënë ni lani na e. Ni la si ala mä aye so na ala bâ ni.’

Tongana Pierre afa tënë ti aye so asi na Jésus, vundu asara azo ni mingi. Tongaso, ala hunda tënë so: ‘A lingbi e sara nyen?’ Pierre atene na ala: ‘A lingbi ala changé dutingo ti ala na ala wara batême.’ Tongaso, tâ gi na lango ni so azo 3 000 tongaso awara batême na ala ga adisciple ti Jésus.