KUNI misilete aana noo manni Yesuusi rosaanooti. Insa Yesuusi yiinota hajajante Yerusaalamete agadhitanni no. Baalunku agadhitanni heedheenna, mitturichchi lowo geeshsha luule mine woˈmi. Lowo geeshsha bubbissanno bubbe gede ikke luulannorichchooti. Hakkiinnino giirate buwano lawanno arrawi mittu mittunku rosaanchi umira dirri. Mittu mittunku umira noo giira laitto? Kuni baalu ikkinohu mayiraati?

Tini ikkito maalalete! Yesuusi iima Annisi ledo heeˈre, rosaanosira Maganunniha qullaawa ayyaana dirrisanni noo daafiraati. Kuni ayyaani ma assitanno gede kaaˈlinonsaro afootto? Insa baalunku addi addi qaalinni coyidhanno gede assino.

Yerusaalamete noohu lowo manni bubbete gede ikke luulannore macciishshe, maatiro laˈˈara dayi. Konni manni giddo gamu, Isiraeelenniha Phenxeqosxete ayyaana ayirrisara wole gobbanni dayinoho. Hakko wosinira kuni coyi mageeshsha xagge ikkinonsakka! Kuni manni uminsa qaalinni Maganu assinoha hagiirsiisanno coye rosaano coyidhanna macciishshino.

Wole gobbanni daggu mannooti togo yitu: ‘Kuni baalunku manni Galiilu mannaati; ikkina ninke gobbara coyiˈnannihunni konni babbaxxino qaalinni coyidhannohu hiitto ikkiteeti?’

Hakkiinnino Pheexiroosi kuni ikkinohu hiittoonniitiro kulansara gotti yii. Isino qoonqosi gotti asse Yesuusa shinoonni garanna Yihowa reyotenni kayisinosi gara mannaho kuli. Togo yii: ‘Yesuusi xa iima Maganu qiniiteenni no. Kuneeti dirriseemmo yiinoha qullaawa ayyaana dirrisino. Tenne maalale laˈinoonnihunna macciishshitinoonnihu iseraati.’

Pheexiroosi tenne coyiˈrita, duuchchu mannooti Yesuusira iillino qarra macciishshite lowo geeshsha dadillitu. Konni daafira, ‘Xa ma assinokka?’ yite xaˈmitu. Pheexiroosino, ‘Bunshete doogoˈnenni higgine cuuamme’ yiinsa. Konni daafira hakko barra calla mito 3,000 ikkanno manni cuuame Yesuusi rosaano ikki.