ERAAS itunga lu ikatupitok luka Yesu. Arimasi kesi nges kosodete asalakin Yerusalem. Napidarete kesi kere nepepe, kilelebun airuruma togo kere. Bala ekwam loekusi kagogong. Kotakanut do angajepa nuka akim kuju kakwes nanginidiope oisisiak. Ipedori ijo aanyun akim kokuju nanginidiopet kakesi? Inyo itejenunit na kere?

Erai aumokinet! Abongo Yesu kuju nejai ka Papake, ido ejai ngesi abukokin emoyo lokalaunan loka Edeke nejaas iketupitok. Ijeni ijo nu einaki emoyo lo kesi aswam? Kogeut kere einer angajepa nuegelegela.

Kiirasi itunga luipu ko Yerusalem airaruma ngin, nasubit bala ekwam lo ekusi noi, kopotu aanyun inyo iswamaa. Itunga icie eraas luka akwapin acie lueponitos nee kanuka epucit loka Isiraelin loka Pentekosit. Koumosis ipejok lu noi! Kiirasi kesi ikesisiak inerasi kotoma angajepa kec nuka iboro luajokak luiswamat Edeke.

Kobalas ipejok: ‘Itunga lu kere eraas Igalilayan. Ikwaikini ai kane ebe, epedorete kesi ainer angajepa nu nuegelegela nuakwapin wok?’

Kobwo do kwana Petero aitetemikin kes. Kikeu ekeporoto kolimok itunga epone lo aarere Yesu ka epone lo etajaruna Yawe nges. Kobala Petero ebe: ‘Kwana do ejai Yesu kuju akan nakoteten naka Edeke. Abuku do ngesi emoyo lokalaunan loesumunitai. Ngupengun ianyuniata yesi kapupun aumonokineta nu.’

Kelimu Petero akiro nu, kitironikinos itunga luipu kanu eswamaikinitai Yesu. Ingita kesi ebe: ‘Kekonakis ai?’ Kolimok Petero kes: ‘Kijulakisi aijar kus kibatisaunos.’ Aso apaaran ngipengin kibatisaunos itunga bala 3,000 ido koraunos ikatupitok luka Yesu.