105-нҗи хекая

Иерусалимде гарашярлар

ОТУРАНЛАР Исаның шәгиртлери. Олар Исаның айданларына гулак асып, Иерусалимде галдылар. Олар гарашып отыркалар, бирден гүйчли елиң өвсүши ялы гөкден бир шуввулды туруп, өйи бүтинлей долдурды. Соңра олара одуң ялынлары кимин бөлүнен диллер гөрнүп, хер бириниң үстүне гонды. Суратдакы диле меңзеш ялынлары гөрйәңми? Бу нәме болдугыка?

Хакыкы гудрат! Иса гөге Атасының янына барып, шәгиртлерине мукаддес рухдан берйәр. Мукаддес рухуң олара нәхили тәсир эденини билйәңми? Әхли шәгиртлер дүрли диллерде гүрләп башлаярлар.

Шол вагт Иерусалимдәки адамларың көпүси гүйчли елиң шуввулдысыны эшидип, нәме боланыны билмек үчин оларың янына баряр. Оларың арасында башга миллетли адамлар хем барды, себәби олар Иерусалиме Пентикост байрамыны беллемәге гелипдилер. Олар хайран галярлар! Себәби Исаның шәгиртлери Худайың гудратлы ишлери барада оларың эне дилинде гүррүң берйәрди.

«Олар җелилели дәлми нәме? Онда нәдип бизиң эне дилимизде гүрлейәрлер?» дийип, адамлар хайран галярлар.

Шонда Петрус еринден туруп, адамлара Исаның өлдүрилиши ве Ехованың оны дирелдиши барада сесли гүррүң берйәр. Петрус олара: «Иса хәзир гөкде Худайың сагында. Ол вада эден мукаддес рухдан берди. Шонуң үчин сиз шу гудратлары гөрйәңиз ве эшидйәңиз» диййәр.

Петрусың сөзлерини диңләп, көп адамлар Иса эрбетлик эдендиги үчин гынанярлар. Олар Петрусдан: «Биз нәме этмели?» дийип сораярлар. Петрус олара: «Яшайшыңызы үйтгедип, сувда чокундырылың» диййәр. Шол гүнүң өзүнде 3 000-е голай адам сувда чокундырылып, Исаның шәгирди болды.

Ресулларың ишлери 2:1—47.