KO E kakai ko ‘ení ko e kau muimui ia ‘o Sīsuú. Na‘a nau talangofua ki ai ‘o nofo pē ‘i Selusalema. Pea lolotonga ‘a ‘enau tatali kotoa fakatahá, na‘e fonu ‘a e falé ‘i he longoa‘a lahi. Na‘e ongo ‘o hangē ko ha ‘oho mai ‘a ha matangi mālohi. Pea na‘e kamata ke hā ‘i he funga ‘ulu ‘o e kau ākongá taki taha ha ngaahi ‘elelo‘i afi. ‘Oku lava ke ke sio ki he afi ‘i ‘olunga ‘iate kinautolu taki taha? Ko e hā ‘a e ‘uhinga ‘o e ngaahi me‘a ko ‘ení?

Ko ha mana ia! Na‘e toe ‘i hēvani ‘a Sīsū mo ‘ene Tamaí, pea na‘á ne hua‘i hifo ‘a e laumālie mā‘oni‘oni ‘o e ‘Otuá ki he‘ene kau muimuí. ‘Okú ke ‘ilo pe ko e hā na‘e fakatupunga ‘e he laumālie ko ení ke nau faí? Na‘a nau kamata kotoa ke lea ‘i he ngaahi lea kehekehe.

Na‘e tokolahi ‘a e kakai ‘i Selusalema na‘a nau fanongo ki he longoa‘a ‘o hangē ko ha matangi mālohí, pea na‘a nau ha‘u ke sio pe ko e hā ‘a e me‘a ‘oku hokó. Ko e ni‘ihi ‘o e kakaí na‘e mei he ngaahi fonua kehe pea na‘a nau ‘i heni ki he kātoanga ‘a e kau ‘Isilelí ko e Penitekosi. Ko ha ‘ohovale ē ka ko e kau ‘a‘ahi mai ko ‘ení! Na‘a nau fanongo ki he‘enau ngaahi lea totonu ‘anautolú ‘oku lea‘aki atu ia ‘e he kau ākongá ‘o kau ki he ngaahi me‘a fakaofo kuo fai ‘e he ‘Otuá.

Na‘e pehē ‘e he kau ‘a‘ahí: ‘⁠Ko e kakai kotoa ko ‘ení mei Kāleli. Ko ia ai, ‘oku anga-fēfē ‘a ‘enau malava ke lea ‘i he ngaahi lea kehekehe ko ‘eni ‘a ia ko e lea ia ‘a e ngaahi fonua ‘oku mau ha‘u mei aí?’

Na‘e tu‘u hake leva ‘a Pita ke fakamatala kiate kinautolu. Na‘á ne lea le‘o lahi mo tala ki he kakaí ‘o kau ki hono tāmate‘i ‘o Sīsuú pea na‘e toe fokotu‘u ia ‘e Sihova mei he maté. Pea pehē ‘e Pita: ‘ ‘Oku ‘i hēvani he taimí ni ‘a Sīsū ‘i he to‘omata‘u ‘o e ‘Otuá. Pea kuó ne hua‘i hifo ‘a e laumālie mā‘oni‘oni na‘e tala‘ofa. Ko e ‘uhinga ia ‘oku mou mamata mo fanongo ai ki he ngaahi mana ko ‘ení.’

‘I he lave ‘a Pita ki he ngaahi me‘á ni, na‘e ongo‘i fakatomala lahi ‘a e kakai tokolahi fekau‘aki mo e me‘a na‘e fai kia Sīsuú. Na‘a nau ‘eke: ‘⁠Ko e hā ‘oku totonu ke mau faí?’ Na‘e tala ‘e Pita kiate kinautolu: ‘ ‘Oku fiema‘u ke liliu ho‘omou founga mo‘uí pea papitaiso.’ Ko ia ‘i he ‘aho pē ko iá na‘e papitaiso ai ‘a e kakai ‘e toko 3,000 nai pea nau hoko ko e kau muimui ‘o Sīsū.