JA IXUK winike bʼa dibujo nake snochumane Jesús. Skʼuʼuneje ja jas yalunej ja Jesús sok ti kanele bʼa Jerusalén. Yajni nake ti aye tsoman wane majlanel ja bʼa yojol ja naʼitsi yabʼye jun rwido, jachʼ jastal jun tsatsal ikʼ bʼa wa x-ekʼ weʼgo. Jujune ja bʼa ixuk winik aye tsomani kʼe ajluk jastal jun yat kʼakʼ ja bʼa s-olomeʼi. ¿Wan maʼ xbʼobʼ awil ja bʼa dibujo ja yat kʼakʼ tey bʼa s-olomeʼi? ¿Jas wa stojolan ja it?

Ja it juni niwan senyaʼala yujni ja Jesús kumxita bʼa satkʼinal soka sTati sok wan yajel koʼuk ja yip ja Dyosi sbʼaja snochumaniki. ¿Wan maʼ xa naʼa jasa kʼe skʼuluk ja ipal it yajni koʼ sbʼajeʼi? Spetsanile kʼe kʼumanuke tuktukil kʼumal.

Jitsan ixuk winik ja bʼa Jerusalén yabʼye ja rwido it bʼa jachʼ jastal jun tsatsal ikʼ sok jak yil-e jasa wan ekʼeli. Jujuntik ixuk winike jakele bʼa pilan chonabʼik bʼa skʼintajel ja kʼin israʼelenyo bʼa Pentecostés. ¡Jelni chamyabʼjel yiʼaje ja ulatanumik it! Ja nebʼumanik jumasaʼ wane kʼumal bʼa skʼumal yeʼnle sbʼaja jastik junuk jel tsamalik skʼulunej ja Dyosi.

Ti yalawe ja ulatanumiki: «Spetsanil ja ixuk winik jumasaʼ it ti swinkile bʼa Galilea. Anto, ¿jastal lek wa snaʼawe ja jkʼumaltiki yajni ti jakelotik bʼa tuktukil chonabʼ?».

Ja yuj ja Pedro kʼe tekʼan bʼa oj xchol yabʼ ja ixuk winiki. Kʼe kʼumanuk tsats sok kʼe yal yabʼ ja ixuk winiki jastal milji ja Jesusi. Chomajkil yala ja Jyoba yaʼa ta sakʼwuk. Jachʼ yala: «Ja weʼgo ja Jesusi tixaʼay bʼa satkʼinal bʼa stsʼeʼel ja Dyosi sok yaʼa koʼuk ja ipal it kʼapubʼali. Ja yuj jaʼ stojolil ja senyaʼik it».

Yajni ja Pedro chʼak yal ja jastik junuk it, jitsan ja bʼa ixuk winike jaw syatsʼa sbʼaj ja yaltsile yuja jas kʼulaji yi ja Jesusi, ja yuj ti sjobʼoweʼa: «¿Jas oj jkʼuluktikon?». Ja Pedro yala yabʼye: «Tʼilan oj atukbʼesex jawa sakʼanilexi sok oj awiʼex jaʼ». Ja kʼakʼu jaw, jun 3,000 ixuk winik yiʼaje jaʼ sok ochye snochuman Jesús.