AʼIYEJ 105
Ay bin la smaliyik ta Jerusalén
TE ANTS winiketik ini jaʼ te jnopojeletik yuʼun te Jesuse. Te kʼalal jilik ta Jerusalén jich la yakʼik ta ilel te la schʼuumbeyik smantal te Jesuse. Te kʼalal spisil yakalik ta maliywanej-ae, ta oranax ay bin tulan kʼopoj jich bitʼil tulan ikʼ te xjuʼet tal te la spul sba ta yutil nae. Tey-abi chiknaj jich bitʼil yat kʼajkʼ ta sjolik ta jujuntul. ¿Yabal awil te kʼajkʼ te ay ta sjol ta jujuntul te jnopojeletike? ¿Bin swentail ini?
¡Jaʼ jun milagro! Ayix ta chʼulchan yan buelta te Jesús sok te sTate, sok yak ta smalel te chʼul espíritu yuʼun Dios ta stojol te jnopojeletik yuʼune. ¿Yabal anaʼ bin akʼbotik spas yuʼun te chʼul espiritue? Spisil jajchik ta kʼop ta yanyantik kʼopiletik.
Bayal ta jtul ants winiketik ta Jerusalén la yaʼiyik stojol te bin-a te tulan kʼopoj jich bitʼil te ikʼe, jich tal yilik bin-a te kʼot ta pasele. Ay machʼatik te talemik ta yanyantik nación ta spasel te kʼin Pentecostés yuʼun te israeletike. ¡Chajpnax-a te bin la yilik te j-ulaʼtaywanejetike! Melel te jnopojeletike kʼopojik ta skʼopiknix te ants winiketik ta swenta te bintik chajpnax spasoj-a te Diose.
Te machʼatik ayik ta ulaʼtaywaneje jich la yalik: Spisil te ants winiketik ini jajchemik tal ta Galilea. Jaʼ yuʼun, ¿bin utʼil-a te ya xkʼopojik ta jkʼoptik jich bitʼil te talemotik ta yanyantik nacione?
Jich te Pedro la stejkʼan sba ta xcholbeyel skʼoplal te bin kʼoem ta pasele. Tulan kʼopoj ta xcholbeyel yaʼiy te ants winiketik te bitʼil la smilik te Jesuse, sok te chaʼkuxajtesot yuʼun te Jehovae. Sok jich la yalxan te Pedroe: Ta ora ini ayix ta chʼulchan ta swaʼel kʼab Dios te Jesuse. Jaʼ smalojix tal te chʼul espíritu te yaloj jilele. Jaʼ ta swenta te kʼot ta pasel te milagroetik ini.
Te kʼalal jich la yal te Pedroe, bayal ta jtul te ants winiketik te ayik tey-ae la smel yoʼtanik yuʼun te bin la yichʼ pasbeyel te Jesuse. Jich la sjojkʼoyik: ¿Bin ya skʼan ya jpaskotik? Jich albotik yuʼun te Pedroe: Ya skʼan ya asujtes awoʼtanik sok akʼa abaik ta ichʼ jaʼ. Ta kʼajkʼal-abi ayniwan 3,000 ta jtul te la yichʼik jaʼ sok la yakʼ sbaik ta jnopojel yuʼun te Jesuse.
