LI KRIXCHANOETIK liʼe jaʼ yajtsʼaklomtak Jesús. La xchʼunbeik smantal, yuʼun muʼyuk xlokʼik batel li ta Jerusalene. Kʼalal te tsobol skotolike, oy kʼusi tsots lik bakʼuk ta spʼejel li nae. Xkoʼolaj kʼuchaʼal ikʼ ti xjumumet ch-echʼ ta anile. Vaʼun ta jujuntal kʼot ta sjolik sleb kʼokʼ. ¿Mi xa vil li sleb kʼokʼ ta jujuntal li yajtsʼaklomtak Cristoe? ¿Kʼusi smelolal leʼe?

¡Jaʼ skʼelobil juʼelal! Li Jesuse te xa oy ta vinajel xchiʼuk sTot, pe yakal ta xakʼ talel li xchʼul espiritu Dios ta stojolal li yajtsʼaklomtake. ¿Mi xa naʼ kʼusi akʼbat spasik yuʼun li chʼul espiritue? Skotolik lik kʼopojikuk ta yan kʼopetik.

Epal krixchanoetik ta Jerusalén la jyaʼiik li kʼusi tsots yakal chbakʼ kʼuchaʼal ikʼe, tal skʼelik kʼusi chkʼot ta pasel. Oy jlom krixchanoetik likemik tal ta yan lum sventa li kʼin Pentekostes ti tspasik li j-israeletike. ¡Chʼayal to kʼot yoʼontonik li jvulaʼaletik taje! Yuʼun li yajtsʼaklomtak Cristoe yakal ta xalbeik krixchanoetik ta skʼop stukik li kʼusitik labal sba spasojan li Diose.

Skotol li krixchanoetik liʼe, likemik ta Galilea. ¿Kʼuxi xkʼopoj yuʼunik li kʼopetik ta jlumaltike?, xiik li jvulaʼaletike.

Li Pedroe vaʼi, lik kʼopojuk. La jyalbe krixchanoetik kʼuxi la jyichʼ milel li Jesuse, xchiʼuk noxtok la jyal ti la jyichʼ chaʼkuxesel yuʼun Jeova li Jesuse. Li Pedroe xi la jyale: Li Jesuse te xa oy ta vinajel ta sbatsʼi kʼob Dios. La xa jyakʼ tal li chʼul espiritu ti yalojbe onoʼox skʼoplale, xi. Jech oxal jech kʼot ta pasel li skʼelobiltak juʼelal liʼe, xi.

Kʼalal jech la jyal li Pedroe, epal krixchanoetik chopol la jyaʼi yoʼontonik ta skoj ti kʼusi la jyichʼ pasbel li Jesuse. ¿Kʼusi skʼan jpaskutik?, xi la sjakʼik. Li Pedroe xi la stakʼe: Skʼan xa jel akuxlejalik xchiʼuk skʼan xa vichʼik voʼ, xi. Li vaʼ kʼakʼal taje la jyichʼik voʼ oxmil krixchanoetik, vaʼun kʼotik ta yajtsʼaklomtak Jesús.