Tantara 105

Niambin̈y Ta Jerosalema

OLO aby io mpianatra Jesosy. Irô nan̈araka volan̈a Jesosy, ke nidôko ta Jerosalema. Irô koa fa nivory, naresaka tan-tran̈o tao, karaha sikilaony in̈y. Baka iô, tan̈abo lohan-drô nisy lelan’ny môtro. Hitanao irô amy sary io? Ino eky dikan’izio?

Izio fahagagan̈a! Jesosy koa fa nimpody tamy Babany an-dan̈itry an̈y, izy nandatsaka fan̈ahy masin̈in’ny Zan̈ahary tamy mpianatranany. Nahavita nan̈ino irô koa fa nahazo fan̈ahy masin̈y io? Irô jiaby nivadiky nahay volan̈a tsy nin-drô.

Maro olo ta Jerosalema naharen̈y raha maresaka be io, ke nan̈aton̈o. Sasany tamin-drô boaka an-tany hafa, han̈aton̈o Pentekosta, fetin’Israelita. Gaga irô tamy zen̈y! Ren̈in-drô mpianatra aby io nivolan̈a raha mahagaga nataon’ny Zan̈ahary tamy volan̈an-drô.

Volan̈in-drô: ‘Olo aby io karaha boaka Galilia, ke karakôry nahaizan-drô volan̈atsika?’

Petera amy zay nitsangana nan̈azava tamin-drô fa Jesosy nivonen̈a, baka iô Jehovah nanangana izy tamy maty. Volan̈in’i Petera: ‘Jesosy iziô an-dan̈itry an̈y, ankavanan̈a Zan̈ahary. Izy nivolan̈a fa han̈amia fan̈ahy masin̈y zahay. Zen̈y nahavy anarô mahita salakady maharen̈y fahagagan̈a io.’

Volan̈a Petera koa fa tapitry, maro tamin’olo aby io nalahelo naharen̈y raha jiaby nahazo Jesosy. Volan̈in-drô: ‘Ke ino raha tôkony hataonay?’ Petera namaly: ‘Anarô mila miova, baka iô hatao batisa.’ Tamin’andra io, olo 3 000 natao batisa, ke nanjary mpianatra Jesosy.

Asan’ny Apostoly 2:1-47.