ŴANDUŴA ali ŵakumkuya Yesu. Jemanjaji atesile yindu mwakumpikanila jwalakwe, m’yoyo atemi mu Yelusalemu. Wosope paŵajembeceyaga, m’nyumbamo mukupikanika lisegwe. Likupikanika mpela mbungo jamacili mnope. Kaneko malamba ga moto gakutanda kuwonecela pamtwe pa jwakumkuya Yesu jwalijose. Ana akuwuwona motowo pamtwe pa jwakulijiganya jwalijose? Ana yosopeyi yikugopolela cici?

Yili yakusimonyesya! Yesu awujile kwinani, ali yimpepe ni Atati ŵakwe. Sambano pandaŵiji akukusulila msimu weswela pamtwe pa ŵakulijiganya ŵakwe. Ana akumanyilila kuti msimuwu ukwatendekasya kutenda cici? Wosope akutanda kuŵeceta mu yiŵeceto yakulekanganalekangana.

Ŵandu ŵajinji akupikana lisegwe lyalikupikanika mpela mbungo jamacili lila, m’yoyo akwisa kukulola cacikutendekwa. Ŵandu ŵane ali ŵakutyocela m’mitundu jine ŵayice kukutenda nawo cindimba ca Ayisalayeli ca Pentekote. Acalendoŵa akusimonga mnope! Akwapikana ŵakumkuya Yesu ŵala ali mkuŵeceta pakwamba ya yindu yekulungwa yatesile Mlungu mu yiŵeceto yawo.

Acalendoŵa akuŵeceta kuti: ‘Ŵandu wosopeŵa ali ŵa ku Galilaya. Sambano yikukomboleka wuli kuti aŵeceteje yiŵeceto yakulekanganalekangana ya m’yilambo yatutyocele?’

Sambano Petulo akwima kuti ŵatagulile jemanjajo. Jwalakwe akuŵeceta mwakwesya maloŵe pakwasalila ŵanduwo yayatendekwe pakuwulajikwa kwa Yesu soni kuti Yehofa ŵamjimwisye ku ŵawe. Petulo akwasalila kuti: ‘Sambano Yesu ali kwinani kumkono wakumlyo wa Mlungu. Soni jwalakwe apelece msimu wacilangano. Ni ligongo lyakwe jemanja ayiweni ni kuyipikana yakusimonjesyayi.’

Sambano pamalisisye Petulo kuŵeceta yeleyi, ŵandu ŵajinji akulitendela mnope canasa pa yayamtendecele Yesu. Ni akuwusya kuti: ‘tutende wuli m’we? Petulo akwasalila kuti: ‘Asinde ndamo syawo soni abatiswe.’ Sambano palisiku lilyolyo ŵandu ŵakwana 3,000 akubatiswa nikuŵa ŵakumkuya Yesu.