LE MÁAKOʼOBAʼ u yéet máanoʼob Jesús. Tu beetoʼob le baʼax aʼalaʼabtiʼoboʼ, pʼáatoʼob Jerusalén. Le táan u múuchʼ páaʼtajoʼoboʼ, yaan baʼax tu yuʼuboʼob ku juum ichil tuláakal le najoʼ. Bey jeʼex u juum upʼéel kʼaʼamkach iikʼeʼ. Tu yóokʼol u pool cada utúuleʼ chíikpaj u chan wóol kʼáakʼ ku tóochʼiʼiʼ. ¿Táan wa wilik? Lelaʼ, ¿baʼax u kʼáat yaʼale?

¡Upʼéel milagro! Jesuseʼ tiaʼan tu kaʼatéen yiknal u Taata teʼ kaʼanoʼ, táan u wekik u kiliʼich muukʼ Dios yóokʼol u j-tsaypachoʼob. ¿A wojel wa baʼax áantaʼab u beetoʼob tumen le kiliʼich muukʼoʼ? Áantaʼaboʼob utiaʼal tsikbal ich jejeláas tʼaanoʼob.

Yaʼab máakoʼob yanoʼob tu kaajil Jerusaleneʼ tu yuʼuboʼob le sen juum bey kʼaʼamkach iikʼoʼ, ka taal u yiloʼob baʼax ku yúuchul. Yanoʼobeʼ táanxel luʼumiloʼob, taaljaʼanoʼob tu kʼiimbesajil le Pentecostés ku beetik le israelitaʼoboʼ. ¡Le uʼulaboʼobaʼ jach jaʼakʼ u yóoloʼob! Tumen le j-kaambaloʼoboʼ táan u tsikbalkoʼob le jatsʼuts baʼaloʼob u beetmaj Jéeoba, ich u tʼaan le uʼulaboʼoboʼ.

Le uʼulaboʼoboʼ tiaʼaloʼob: Le máakoʼobaʼ Galilea u taaloʼob, ¿bix túun u páajtal u tʼaanoʼob jeʼex le jejeláas tʼaan k-beetkeʼexoʼ?

Pedroeʼ waʼalaj u tsoltiʼob. Tu kʼaʼam aʼalaj tiʼe máakoʼob bix kíimsaʼabik Jesusoʼ, yéetel tiaʼalaj kaʼa kuxkíintaʼab tumen Jéeoba. Pedro túuneʼ tiaʼalaj: Beooraaʼ Jesuseʼ tiaʼan teʼ kaʼan tu tséel Diosoʼ. Tsʼoʼok u tsʼáaiktoʼon le kiliʼich muukʼ u yaʼalmajoʼ. Le oʼolal úuch le milagroʼobaʼ.

Yaʼab tiʼe máakoʼob tu yuʼuboʼob u tsikbal Pedrooʼ, jach yaachaj tu yóoloʼob baʼax beetaʼab tiʼ Jesús. Le oʼolal tu kʼáatoʼob: ¿Baʼax kʼaʼabéet k-beetik? Pedroeʼ tiaʼalajtiʼob: Kʼaʼabéet a kʼexik a kuxtaleʼex yéetel a wokjaʼex. Tiʼe kʼiin jeʼeloʼ óoliʼ tres mil máakoʼob okjaʼanaji ka túun káaj u tsaypachkoʼob Jesús.