Historia 105

Biaanacabe Jerusalén

CA binni riʼ nga xpinni Jesús. Laacabe bizuubacabe stiidxaʼ Jesús ne biaanacabe Jerusalén. Ne laga guirácabe cabézacabe la? málasi uxidxi biete xiixa de guibáʼ casi ora rundubi ti bi yooxhoʼ, ne bidxani ndaaniʼ yoo ra nuucabe que. Ne bele casi ludxi rihuinni galaa ique cada tóbicabe. Ñee zanda guʼyuʼ bele ca galaa ique cada tobi de ca discípulo ca la? Xi riníʼ ndiʼ pue.

¡Ti milagru ndiʼ! Jesús maʼ nuuné Bixhoze guibáʼ sti biaje, ne maʼ cudiibe espíritu santu ca xpínnibe. Ñee nannuʼ xi rucaa espíritu santu ca laacabe gúnicabe la? Guirácabe ruzulú riníʼcabe gadxé gadxé diidxaʼ.

Stale binni runadiaga ridxi casi bi que, ne reeda guuyacabe xi cayaca. Stale de ca binni que zeedacaʼ de sti guidxi para gápacaʼ saa Pentecostés ni rapa ca israelita que. Guizáʼ bidxagayaa guiráʼ ni yeganna que, purtiʼ ca discípulo que caniʼcaʼ gadxé gadxé diidxaʼ de ca guendaridxagayaa ni Dios huayuni.

Ca binni riʼ de Galilea laacaʼ, na guiráʼ ca binni ni yeganna Jerusalén que. Yanna, ximodo nga ganda guiníʼcabe ca diidxaʼ ni riníʼ ca binni xquídxinu pue.

Pedru ruzuhuaa para gusiene laacabe. Laabe riníʼnebe laacaʼ de modo guti Jesús, ne de que Jiobá gundisaʼ laabe lade gueʼtuʼ. Yanna la? na Pedru rabi laacaʼ Jesús maʼ zuba ladu derechu stiʼ Dios. Ne laabe bidiibe laacaʼ espíritu santu ni bizabiruaabe que. Pur nga runi, cahuinni ca milagru riʼ.

Ora Pedru riníʼ ca diidxaʼ riʼ la? stale de ca binni que guizáʼ riuubaʼ laacabe ni bíʼnicabe Jesús. Xi naquiiñeʼ gúnidu pue, na ca binni que. Pedru rabi laacabe: Naquiiñeʼ guchaatu modo nabánitu ne chúʼnisatu. Ne dxi queca guyuunisa 3.000 binni ne reeda gácacabe xpinni Jesús.

Hechos 2:1-47.