ADKINTUFINGE ti werken püllü nülalniefi ti karsel ñi wülngiñ. Neykümyefi Jesu tañi pu apostol. Peafiyiñ chumngelu (chemu) karsel konkülekeyngün.

Pichiñma (püchüñma) ñi rupan mu, Jesu wütrünagelfi tati lif küme püllü tañi pu inawngepelu. Femngechi rupay chi dungu: Pedro Juan engu amuy Jerusalen ñi ngillatuwe ruka mew kiñe nag antü. Üye mew, inafül tati ngillatuwe ruka ñi wülngiñ mew, müley kiñe kutrankülekefuchi wentru kom ñi mongen mu. Tati pu che fill antü yepukeeyew ñi ngillatuplatayafiel tati pu che konpukelu ngillatuwe ruka mew. Pefilu Pedro engu Juan ‘Eluen ta plata’ pifi. ¿Chumayngu?

Witrakünuwingu ka leliwülfingu. ‘Nielan ta plata,’ Pedro pieyew, ‘welu tañi nieel iñche eluaeyu. ¡Jesu ñi üy mew, witrange ka trekatunge!’ Pedro nüñmafi ti wentru ñi man kuwü, ka müchay müten ti küntro kiñe rüngkün mu, witrapüray. Tati pu che pefilu tüfa, afmatuleweyngün ka ayüwi engün tüfachi afmangechi dungu mu.

‘Ngünechen ñi newen mew, wiñomongeltufi ta Jesu, femiyu tüfachi afmatufalchi dungu,’ pi Pedro. Pedro ka Juan petu dungufilu ti pu che, küpayngün kiñeke longkolechi religioso. Illkuleyngün (lladküleyngün), Pedro ka Juan am feypimekefilu tati pu che Jesu ñi wiñomongelngetun. Fey mew nüngey ka karseltükungey engu.

Kangelu antü mew tati pu longkolechi religioso nieyngün kiñe fütra trawün. Fey mew, küpalngey Pedro, Juan ka tati tremolngechi (mongelngechi) wentru. Ramtungeyngu: ‘¿Chem newen mew femimu tüfachi dungu?’

Pedro feypi: ‘Tremolngetuy (mongelngetuy) Ngünechen ñi newen mew, fey wiñomongeltufilu Jesu.’ Tati pu saserdote kimlayngün ñi chumal, ngelay ñi chem piael engün tüfachi afmatufalchi dungu ñi rupan. Feymu lle, feypingey tati epu apostol ñi dunguwenoal engu ta Jesu mew, fey neykümkünungetuy engu.

Rupaley ti antü, ka tati pu apostol amuley ñi amulniefiel Jesu ñi dungu, ka tremolnierpufi (mongelniepufi) tati pu kutrankülelu. Tüfachi afmatufal dungu püdümngey. Feymu lle fentren pu che müleyelu inafül Jerusalen waria mew kütu, küpalyeyngün ñi pu kutran tati pu apostol ñi tremolaetew (mongelaetew). Feymu, tati pu longkolechi religioso, ütriringün, ka presuntükutufi tati pu apostol. Welu kiñe dungu rupay.

Pun mew, Ngünechen ñi werken püllü nülapafi ti wülngiñ karsel mu, chumngechi peafuymi tüfa mu. Tati werken püllü feypi: ‘Amutumün, ka witrakünuwmün ti ngillatuwe ruka mew, ka amulepe tamün dungufiel pu che.’ Kangelu antü mew puliwentu, werkülu tati pu longkolechi religioso ñi yemengeal tati pu apostol, pelafingün. Fey wüla pefingün ti ngillatuwe ruka mu, ka küpalfingün Sanedrin mew.

‘Feypiwkeyiñ tamün kimeltuwenoael Jesu ñi dungu,’ pi tati pu longkolechi religioso. ‘Welu eymün apolfimün kom Jerusalen mew tamün kimeltun.’ Tati pu apostol feypi engün: ‘Wentru feyentulayafiyiñ (müngeltulayafiyiñ), welu müley taiñ feyentuafiel (müngeltuafiel) Ngünechen taiñ ngünenieetew.’ Ka amuley ñi wüldungual engün. ¡Müna küme inayentufalchi dungu! ¿Felelay?