SESE angel mi eberede usụn̄ ufọk n̄kpọkọbi. Mme owo oro enye anamde ẹwọn̄ọ ẹdi mme apostle Jesus. Yak ise se inamde ẹsịn mmọ ke n̄kpọkọbi.

Ibịghike nte ẹken̄wan̄a edisana spirit ẹduọk mme mbet Jesus. Ndien emi edi se itịbede: Peter ye John ẹsan̄a ẹka temple ke Jerusalem uwemeyo kiet. Do, ke enyịn usụn̄, owo mbụn̄ọ kiet tọn̄ọ ke emana odu. Mme owo ẹda enye ẹka do kpukpru usen ndiben̄e mmọ oro ẹkade temple okụk. Ke enye okụtde Peter ye John, enye eben̄e mmọ ẹnọ enye n̄kpọ. Nso ke mme apostle ẹmi ẹdinam?

Mmọ ẹtuak ẹda ẹnyụn̄ ese mbọm mbọm owo emi. Peter ọdọhọ, ‘Ami nnyeneke okụk, edi nnyenọ fi se nnyenede. Ke enyịn̄ Jesus, daha da san̄a!’ Peter ndien omụm owo emi ubọk nnasia, ndien owo emi ọfrọ ke enyọn̄ ọtọn̄ọ ndisan̄a iwiwa. Ke mme owo ẹkụtde emi, mmọ ẹdu ke n̄kpaidem, edi ẹnem esịt ke utọ utịbe n̄kpọ emi.

Peter ọdọhọ, ‘Edi ke odudu Abasi, oro akanamde Jesus eset ke nnyịn inam mme utịbe n̄kpọ ẹmi.’ Ke enye ye John ẹsụk ẹtịn̄de ikọ, usụk mme adaiso ido ukpono ẹsan̄a ẹkpere. Mmọ ẹkop iyatesịt koro Peter ye John ẹtịn̄ ẹnọ mme owo ẹban̄a ediset ke n̄kpa Jesus. Ntre mmọ ẹmụm mmọ ẹsịn ke ufọk n̄kpọkọbi.

Ke udiana usen, mme adaiso ido ukpono ẹmi ẹnyene akamba mbono. Ẹda Peter ye John, ye owo oro mmọ ẹkekọkde ẹdi. Mme adaiso ido ukpono oro ẹbụp, ‘Nso odudu ke mbufo ẹda ẹnam mme utịbe n̄kpọ ẹmi?’

Peter ọdọhọ mmọ ete ke edi ke odudu Abasi, emi akanamde Jesus eset ke n̄kpa. Mme oku oro ifiọkke se ẹkpenamde, koro mmọ ikemeke ndikan̄ nte ke utọ utịbe n̄kpọ emi otịbe ke akpan. Ntre mmọ ẹkpan mme apostle ẹte ẹkutịn̄ ikọ aba ẹban̄a Jesus, ndien ẹyak mmọ ẹnyọn̄.

Nte mme usen ẹbede, mme apostle ẹkaiso ẹkwọrọ ẹban̄a Jesus ẹnyụn̄ ẹkọk mbon udọn̄ọ. Mbụk mme utịbe n̄kpọ ẹmi asuana. Ntre idem mme otu owo ke Jerusalem ẹda mbon udọn̄ọ ẹsọk mme apostle ẹkọk. Emi anam mme adaiso ido ukpono oro ẹfụbe ufụp, ntre mmọ ẹmụm mme apostle ẹdọn̄ ke ufọk n̄kpọkọbi. Edi mmọ idụhe do ibịghi.

Ke okoneyo, angel Abasi eberede usụn̄ ufọk n̄kpọkọbi nte afo ekemede ndikụt mi. Angel oro ete: ‘Ẹka ẹkeda ke temple ẹkaiso ẹtịn̄ ikọ ẹnọ mme owo do.’ Ke ndan̄nsiere ke usenubọk, ke ini mme adaiso ido ukpono oro ẹdọn̄de mme owo ẹka ufọk n̄kpọkọbi ẹkeda mme apostle edi, mmọ ẹma ẹnyọn̄. Ekem mme owo oro ẹkụt mmọ ẹkpepde n̄kpọ ke temple ẹnyụn̄ ẹda mmọ ẹdi efe Sanʹhe·drin.

Mme adaiso ido ukpono ẹdọhọ, ‘Nnyịn ima isọn̄ọ iwụk ite ẹkukpep aba ẹban̄a Jesus. Edi mbufo ẹmẹyọhọ Jerusalem ye ukpepn̄kpọ mbufo.’ Ndien mme apostle ẹbọrọ: ‘Nnyịn inyene ndikop uyo Abasi nte andikara n̄kan uyo owo.’ Ntre mmọ ẹkaiso ẹkpep “eti mbụk.” Nte oro idịghe eti uwụtn̄kpọ inọ nnyịn ndikpebe?