EMAÑAMI mbaʼéichapa pe ánhel ojokohína pe kársel rokẽ ani hag̃ua oñemboty. Opoihína Jesús apostolkuéragui. Jahechamína mbaʼérepa ojegueraháraʼe chupekuéra kárselpe.

Ndaʼaréi oñeñohẽhague espíritu sánto Jesús disipulokuéra ári. Ha koʼág̃a oiko ko mbaʼe: Peteĩ kaʼarúpe Pedro ha Juan oho Jerusalén témplope. Upépe, pe okẽ ypýpe, oĩ peteĩ kuimbaʼe ndoguatáiva onase guive. Káda día ojegueru chupe upépe ojerure hag̃ua pláta umi témplope oikévape. Ohechávo Pedro ha Juánpe, ombaʼejerure avei chupekuéra. Mbaʼépa ojapóta hikuái?

Opyta ha omaʼẽ hikuái pe kuimbaʼére. ‘Ndaguerekói pláta’, heʼi Pedro, ‘péro pe aguerekóva ameʼẽta ndéve. Jesús rérape, epuʼã ha eguata!’. Pedro ojagarra pe kuimbaʼépe ipógui, ha pe kuimbaʼe opo oñemboʼy ha oñepyrũ oguata. Ohechávo umi hénte ko milágro tuichaite, oñemondýi ha ovyʼaiterei.

‘Rojapo ko milágro Ñandejára podér rupive, upe omoingove jey vaʼekue Jesúspe’, heʼi Pedro. Pedro ha Juan oñeʼẽ aja, og̃uahẽ oúvo umi líder rrelihióso hudío. Ipochy hikuái Pedro ha Juan heʼihaguére umi héntepe Jesús oikove jey hague. Upévare ojagarra ha ogueraha chupekuéra kárselpe.

Upe ára rire, umi líder rrelihióso oguereko peteĩ aty guasu. Upépe ogueru hikuái Pedro ha Juánpe ha pe kuimbaʼe haʼekuéra omongueravaʼekuépe. ‘Mbaʼe podér rupivépa pejapo ko milágro?’, oporandu hikuái.

Pedro heʼi chupekuéra ojapohague Ñandejára podér rupive, upe omoingove jey vaʼekue Jesúspe. Umi saserdóte ndoikuaái mbaʼépa ojapóta, pórke ndaikatúi onega ko milágro tuichaite oikohague. Upévare, heʼi chupekuéra anive hag̃ua oñeʼẽ Jesús rehe, ha opoi chuguikuéra.

Ohasa heta día, ha umi apóstol osegi oñeʼẽ Jesús rehe ha omonguera umi hasývape. Umi notísia koʼã milágro rehegua isarambi opárupi. Ha upévare heta hénte oĩva Jerusalén jerére jepe ogueru umi hasývape omonguera hag̃ua chupekuéra umi apóstol. Upévare, umi líder rrelihióso, oenvidiágui chupekuéra, ogueraha kárselpe umi apóstolpe. Péro haʼekuéra ndahiʼaréi upépe.

Pyhare aja, Ñandejára ánhel oavri pe kársel rokẽ, rehechaháicha koʼápe. Pe ánhel heʼi: ‘Tapeho pe témplope ha pesegi peñeʼẽ umi héntepe’. Koʼẽ rire, umi líder rrelihióso omondo ogueruka kárselgui umi apóstolpe, péro ndojetopavéima hesekuéra. Upéi ojetopa chupekuéra pe témplope, ha ojegueraha pe Sanedrín kotýpe.

‘Roʼéma peẽme anive hag̃ua pemboʼe Jesúsgui’, heʼi umi líder rrelihióso. ‘Péro peẽ pemyenyhẽma Jerusalén upe pemboʼévagui.’ Umi apóstol heʼi: ‘Ore rojapovaʼerã Ñandejára heʼíva haʼégui ore governánte, rojaporangue kuimbaʼekuéra heʼíva’. Ha osegi opredika hikuái. Ajépa iporã pe ehémplo omoĩva ñandéve!