Tuffɣa si lḥebs
TAQSIṬ TIS 106
Tuffɣa si lḥebs
WALI lmelk-agi yeldin tawwurt n lḥebs. Irgazen-agi iwumi i yeţserriḥ d inelmaden n Ɛisa. A nẓer tura d acu i ten-yewwin ɣer dinna.
Atan wayen yeḍran mi gɛedda cwiṭ n lweqt segmi i d-yers ṛṛuḥ iqedsen ɣef inelmaden n Ɛisa: Yiwet n tmeddit, Buṭrus akk-d Yuḥenna ulin ɣer lemqam yellan di Yarucalim. Dinna, zdat n tewwurt, ufan yiwen wergaz yellan d aɛiban deg wasmi i d-ilul. Lɣaci srusun-t dayem deg wemkan-nni iwakken ad iţţer (immter) idrimen i widak yeţţalin ɣer lemqam. Mi gwala Buṭrus akk-d Yuḥenna, iḍleb-asen a s-d-fken kra. Acu ara xedmen tura yemceggɛen-agi?
Ḥebsen, muqlen ɣer wergaz-nni ameɣbun. Buṭrus inna-yas: ‘Ur sɛiɣ ara idrimen, meɛna ayen i sɛiɣ, a k-t-fkeɣ. S yisem n Ɛisa, kker telḥuḍ!’ Buṭrus yeṭṭef afus ayeffus n wergaz-nni, imiren kan ibedd ɣef iḍarren-is, ibda ileḥḥu. Lɣaci meṛṛa wehmen yerna ččuṛen d lfeṛḥ mi walan lbeṛhan-agi ifazen.
Buṭrus yenna: ‘S lqeḍra n Ṛebbi, i d-yesseḥyan Ɛisa si ger lmeyytin, i nexdem lbeṛhan-agi.’ Mazal-iten heddṛen neţţa d Yuḥenna, mi d-usan kra n lɛulama n ddin. Zeɛfen aṭas axaṭer Buṭrus akk-d Yuḥenna ţberriḥen i lɣaci belli Ɛisa iḥya-d si ger lmeyytin. Imiren ṭṭfen-ten, dɣa ḍeggren-ten ɣer lḥebs.
Azekka-nni, lɛulama nnejmaɛen wway gar-asen. Wwin-d Buṭrus, Yuḥenna akk-d wergaz-nni i sseḥlan. Lɛulama steqsan-ten: ‘Ansi i wen-d-tekka tezmert swayes i txedmem lbeṛhan-agi?’
Buṭrus yerra-yasen: ‘Sɣur Ṛebbi, i d-yesseḥyan Ɛisa.’ Lmuqeddmin ɛewwqen d acu ara xedmen axaṭer ur zmiren ara ad nekṛen belli lbeṛhan-nni ifazen yeḍra s ṣṣeḥ. Ggullen ihi deg yemceggɛen ur ţɛawaden ara ad hedṛen ɣef Ɛisa, mbeɛd serrḥen-asen.
Skud ţɛeddayen wussan, imceggɛen ţkemmilen ţberriḥen ɣef Ɛisa yerna sseḥlayen imuḍan. Aṭas i geslan s lexbaṛ yeɛnan lbeṛhanat-agi. Ula d imezdaɣ n temdinin i d-yezzin i Yarucalim ţţawin-d imuḍan-nsen bac a ten-sseḥlun yemceggɛen. Annect-a issemɣi-d tismin deg wulawen n lɛulama, dɣa ḍeggren-ten ɣer lḥebs. Acu kan ur qqimen ara aṭas n lweqt dinna.
Deg yiḍ, lmelk n Ṛebbi yeldi tawwurt n lḥebs, akken i tzemreḍ a t-twaliḍ dagi. Yenna-yasen: ‘Ṛuḥet ɣer lemqam, dinna kemmlet ţberriḥet i lɣaci.’ Azekka-nni ṣṣbeḥ, lɛulama ceggɛen irgazen iwakken a d-awin imceggɛen-nni si lḥebs. Lameɛna ulac-iten dinna. Mi gɛedda kra n lweqt, ufan-ten sselmaden di lemqam, dɣa wwin-ten ɣer wexxam n Sanhedrin.
Lɛulama n ddin nnan-asen: ‘Neggull deg-wen ur teţţuɣalem ara aţ-ţemmeslayem ɣef Ɛisa, lameɛna kunwi tɛemmṛem Yarucalim s uberreḥ-agi-nwen.’ Imceggɛen rran-asen: ‘Ilaq a naɣ awal i Ṛebbi yellan d aneḥkam wala i yemdanen.’ Kemmlen ihi ţberriḥen “lexbaṛ n lxiṛ”. Mačči d lemtel yelhan i ɣ-ilaq a netbeɛ?
Lecɣal ixef wis 3 alamma d wis 5.
