KʼARU yook xbʼaanunkil li anjel li wank saʼ li eetalil? Kixte li rokebʼaal li tzʼalam re naq ebʼ li xʼapostol li Jesus teʼelq. Abʼan, kʼaʼut wankebʼ saʼ tzʼalam?

Ebʼ li xtzolom li Jesus ak keʼxkʼul li santil musiqʼej. Saʼ jun ewuuk laj Pedro ut laj Juan kohebʼ saʼ Rochoch li Yos aran Jerusalen. Chi xkʼatq li rokebʼaal li Rochoch li Yos wank jun li winq, sik chalen chaq saʼ xyoʼlajik. Rajlal kutan, keʼxkʼam li winq aʼin, chi tzʼaamank tumin rehebʼ li nekeʼwulak saʼ Rochoch li Yos. Naq kiril laj Pedro ut laj Juan, kixpatzʼ xtumin rehebʼ. Kʼaru kixye laj Pedro ut laj Juan?

Laj Pedro ut laj Juan keʼxaqli ut keʼril li winq. Tojaʼ naq laj Pedro kixye re: ‹Maakʼaʼ intumin, abʼan tinkʼe aawe li wank wikʼin. Saʼ xkʼabʼaʼ li Jesus ninye aawe, waklin!› Laj Pedro kixchap chi ruqʼ li winq ut kiʼok chi bʼeek. Ebʼ li qas qiitzʼin keʼsahoʼk saʼ xchʼool naq keʼril aʼin!

Laj Pedro kixye rehebʼ li qas qiitzʼin: ‹Rikʼin li xmetzʼew li Yos, li kiwaklesink re li Jesus, xqabʼaanu li sachbʼachʼoolej aʼin›. Toj yookebʼ chi aatinak laj Pedro ut laj Juan, naq keʼchalk wiibʼ oxibʼ li xbʼeenil laj tij. Yookebʼ xjosqʼil xbʼaan naq laj Pedro ut laj Juan keʼxye re li tenamit naq li Jesus kiwakliik wiʼ chik chi yoʼyo. Joʼkan naq keʼchapeʼk ut keʼkʼeheʼk saʼ tzʼalam.

Saʼ li jun chik kutan, keʼxchʼuutubʼ ribʼ li xbʼeenil laj tij ut keʼxkʼam laj Pedro, laj Juan ut li sik, li keʼxkʼirtasi. Ut ebʼ li xbʼeenil laj tij keʼxye: ‹Bʼar kichalk leemetzʼew naq xeebʼaanu li sachbʼachʼoolej aʼin?›

Laj Pedro kixye naq rikʼin li xmetzʼew li Yos, li kiwaklesink re li Jesus, xeʼxbʼaanu aʼin. Ebʼ laj tij inkʼaʼ nekeʼxnaw kʼaru teʼxbʼaanu, xbʼaan naq keʼril li sachbʼachʼoolej aʼin. Keʼxye rehebʼ li apostol naq inkʼaʼ chik teʼaatinaq chirix li Jesus ut keʼkanabʼaak chi xik.

Keʼnumeʼk li kutan ut ebʼ li apostol inkʼaʼ keʼxkanabʼ aatinak chirix li Jesus ut inkʼaʼ ajwiʼ keʼxkanabʼ kʼirtasink. Naq ebʼ li kʼalebʼaal, li wankebʼ chi xkʼatq li tenamit Jerusalen keʼxnaw aʼin, keʼxkʼam chaq ebʼ li yaj re naq teʼkʼirtasiiq. Ebʼ li xbʼeenil laj tij keʼok xkaqalinkil ebʼ li apostol, joʼkan naq keʼkʼeheʼk saʼ tzʼalam. Abʼan, ma nakaanaw kʼaru keʼxkʼul ebʼ li apostol saʼ tzʼalam?

Chiru li qʼoqyink, jun li xʼanjel li Yos kixte li tzʼalam, joʼ nakʼutunk saʼ li eetalil. Li anjel kixye rehebʼ li apostol: ‹Ayuqex saʼ Rochoch li Yos ut meekanabʼ xpuktesinkil li chaabʼil esilal›. Naq kisaqewk, ebʼ li xbʼeenil laj tij keʼxtaqla xkʼambʼal chaq ebʼ li apostol, li wankebʼ saʼ tzʼalam, abʼan inkʼaʼ chik keʼtaweʼk. Chirix chik aʼan, keʼtaweʼk saʼ Rochoch li Yos ut keʼkʼameʼk saʼ li Sanedrin, bʼarwiʼ nekeʼraqok aatin.

Ebʼ li xbʼeenil laj tij keʼxye rehebʼ li apostol: ‹Ak xqaye eere naq mexkʼutuk chik, abʼan inkʼaʼ kexʼabʼink. Anaqwan chixjunil li tenamit Jerusalen nekeʼxnaw chik chirix li Jesus›. Ebʼ li apostol keʼxye: ‹Tento naq tooʼabʼinq chiru Yos ut inkʼaʼ chiruhebʼ li winq›. Ebʼ li xtzolom li Jesus inkʼaʼ keʼxkanabʼ aatinak chirix li Yos, aʼin jun li chaabʼil eetalil choʼq qe.