TARORA mũraika haha enyitĩrĩire mũrango mũhingũre wa korokoro. Arũme arĩa ararekereria nĩ atũmwo a Jesu. Tareke tuone nĩkĩ gĩatũmire maikio korokoro-inĩ.

No kahinda kanini kahĩtũkĩte kuuma rĩrĩa arutwo a Jesu maitĩrĩrio roho mũtheru. Na ũũ nĩguo gwatuĩkire: Petero na Johana maathire hekarũ-inĩ Jerusalemu mũthenya ũmwe mĩaraho. Me kũu-rĩ, hakuhĩ na mũrango, nĩ haarĩ na mũndũ wakoretwo arĩ kĩonje kuuma aciarũo. Andũ maamũrehage hau mũthenya o mũthenya nĩguo ahoyage arĩa maathiaga hekarũ-inĩ mbeca. Rĩrĩa onire Petero na Johana-rĩ, akĩmoria mamũhe kĩndũ. Ĩrĩu-rĩ, atũmwo mangĩekire atĩa?

Maatithirie nĩguo merorere mũthĩni ũcio. Petero aamwĩrire atĩrĩ, ‘Ndirĩ na mbeca, no ĩndĩ kĩrĩa ndĩ nakĩo nĩkĩo ngũkũhe. Thĩinĩ wa rĩĩtwa rĩa Jesu, rũgama wĩtware!’ Petero anyitire mũndũ ũcio guoko kwa ũrĩo, akĩrũgarũga na akĩambĩrĩria gũthiĩ. Rĩrĩa andũ monire gĩĩko kĩu, magĩkĩgegeara na magĩkena nĩũndũ wa kĩama kĩu kĩa magegania.

Petero akiuga atĩrĩ, ‘Nĩ hinya wa Ngai, ũrĩa warĩũkirie Jesu kuuma kũrĩ akuũ, watũhotithia gwĩka kĩama gĩkĩ.’ Rĩrĩa aaragia me na Johana-rĩ, atongoria amwe a ndini magĩũka. Maarakarĩte nĩũndũ Petero na Johana nĩ meeraga andũ ũhoro wa Jesu kũriũkio kuuma kũrĩ akuũ. Magĩkĩmahuria na makĩmaikia korokoro-inĩ.

Mũthenya ũyũ ũngĩ atongoria acio a ndini makĩgĩa na mũcemanio mũnene. Petero na Johana, o hamwe na mũndũ ũrĩa maahonetie, makĩrehwo. Atongoria a ndini makĩũria atĩrĩ, ‘Mũrahonania na hinya waũ?’

Petero aamerire atĩ nĩ na ũndũ wa hinya wa Ngai, ũrĩa wariũkirie Jesu kuuma kũrĩ akuũ. Athĩnjĩri-Ngai makĩrigwo nĩ ũrĩa megwĩka, tondũ matingĩakaanire atĩ kĩama gĩkĩ kĩa magegania nĩ gĩekĩkĩte. Kwoguo magĩkaania atũmwo matigacoke kwaria rĩngĩ ũndũ wĩgiĩ Jesu, na makĩmarekereria mathiĩ.

O ũrĩa matukũ maathire na mbere atũmwo magĩthiĩ na mbere kũhunjia ũhoro wa Jesu na kũhonia arĩa arũaru. Ũhoro wa ciama ici ũkĩhunja guothe. Na nĩũndũ ũcio kĩrĩndĩ kĩingĩ kuuma mĩciĩ mĩingĩ ĩrĩa yathiũrũkĩirie Jerusalemu gĩkĩrehe andũ arũaru nĩgetha mahonio nĩ atũmwo. Ũndũ ũyũ ũgĩtũma atongoria a ndini magĩe na ũiru, kwoguo makĩnyita atũmwo makĩmaikia korokoro-inĩ. No matiigana gũikara kũu kahinda karaihu.

Ũtukũ mũraika wa Ngai akĩhingũra mũrango wa korokoro, o ta ũrĩa ũrona haha. Mũraika akĩmeera atĩrĩ: ‘Thiĩi mũkarũgame hekarũ-inĩ, na mũthiĩ na mbere kũhe andũ ũhoro.’ Mũthenya ũyũ ũngĩ kĩroko, rĩrĩa atongoria a ndini maatũmire makanga korokoro makarehe atũmwo-rĩ, magĩkora mathiĩte. Thutha-inĩ ũcio andũ makĩmona makĩrutana hekarũ-inĩ makĩmanyita makĩmarehe Kĩama-inĩ.

Atongoria a ndini makĩmera atĩrĩ, ‘Githĩ tũtiramũkanirie o kũmũkania mũtikarutane na rĩĩtwa rĩa Jesu rĩngĩ, no ĩndĩ nĩmũiyũrĩtie Jerusalemu guothe na ũrutani wanyu.’ Nao atũmwo magĩcokia ũũ: ‘Nĩ kwagĩrĩire tũigue Ngai gũkĩra kũigua andũ.’ Na hĩndĩ ĩyo magĩthiĩ na mbere kũrutana ‘ũhoro ũrĩa mwega.’ Na githĩ ũcio ti mũhaano mwega wa kũrũmĩrĩrũo nĩ ithuĩ?

Atũmwo gĩcunjĩ gĩa 3 nginyagia 5.