INNGILIP parnaarussiviup matua ammatikkaa takoriaruk. Angutit aniguisitai tassaapput Jesusip apustilii. Maanna tusassavat suna pissutigalugu parnaarunneqarsimasut.

Ungasinngitsukkut anersaaq illernartoq Jesusip ajoqersugaanut kuineqarpoq. Maannalu ima pisoqarpoq: Ualit ilaanni Peter Johannesilu Jerusalemimi naalaffimmut iserput. Angut iloqiaasoq isertarfiup saninnguaniippoq. Ullut tamaasa tassunga akiartittarpoq naalaffimmut iseriartortut aningaasanik qinnuigisarlugit. Peter Johannesilu takuleramigit tuneqqulluni qinnuigai. Apustilit qanoq iliussappat?

Unipput nallinnartorlu isigalugu. ’Aningaasaateqanngilanga,’ Peter oqarpoq, ’Pigisannilli tunissavakkit. Jesusip aqqani nikuigit pisullutillu!’ Angutip assaa talerpilleq Peterip tiguaa, erniinnarlu pissippoq pisulerlunilu. Inuit takugamikku tupinnartuliaq pisimasoq tupigusuutigaat nuannaaqalutillu.

’Guutip Jesusimik toqusunit makititsisup tupinnartuliorsinnaanermik piginnaaneqartippaatigut,’ Peter oqarpoq. Taanna Johannesilu oqalutsillugit upperisarsiornikkut pisortanik aggersoqarpoq. Jesus toqusunit makissimasoq pillugu Peter Johannesilu oqalummata kamapput. Taamaattumik tigusaraat parnaarullugillu.

Aqaguani upperisarsiornikkut pisortat ataatsimeersuarput. Peter Johannesilu, angut ajorunnaarsitaat ilagalugu, isertinneqarput. ’Qanoq ittumik pissaaneqarlusi taama tupinnartuliorpisi?’ Upperisarsiornikkut pisortat kamallutik apustilit marluusut oqarfigaat.

Peter oqaluttuarpoq Guuti Jesusimik toqusunit makititsisoq tamatumunnga pisuusoq. Tupinnartuliap pisimanera miserratigisinnaannginnamikku palasit qanoq iliornissartik nalornivaat. Apustilit sioorasaarpaat Jesus oqaluutigeqqunagu, aallartillugillu.

Tamatumali kingornagut apustilit Jesus oqaluutigiuarpaat napparsimasullu ajorunnaarsittarlugit. Tupinnartuliat sumi tamaani erniinnaq ilisimaneqalerput. Illoqarfinnit Jerusalemip eqqaaniittunit allaat inuppassuit tikiussorput napparsimasut aggiullugit apustilinut ajorunnaarsissinnaaqqullugit. Upperisarsiornikkut pisortat sinngalerput, apustilillu tigusaraat parnaarullugillu. Sivisuumilli parnaarussaaqqanngillat.

Unnuami Guutip inngiliata matumik ammaappai, soorlu uani takusinnaagit. Inngili oqarpoq: ’Naalaffimmukaritsi inuillu oqaluffigeqqillugit.’ Aqaguani ullaakkut upperisarsiornikkut pisortat aallartitsimmata apustilit aaqqullugit, peqanngillat. Naalaffimmi ajoqersuisut nanivaat, taavalu killisiuisoqatigiinnut sassartillugit.

’Ilungersorluta inerteraluarpassi Jesus oqaluutigeqqunagu,’ upperisarsiornikkut pisortat oqarput. ’Kisianni Jerusalem ajoqersuutissinnik tamakkerparsi.’ Apustilit akivaat: ’Guuti naalakkatsitut inunnit naalattariaqarneruarput.’ Taamaammat „nutaarsiassaq nuannersoq“ oqaluussissutigiuarpaat. Uatsinnut maligassaalluarput, ilaa?