AKIMONA iwe malaika pa kikye kipikichala washinkula kinzhilo kya kaleya. Bantu bo akasululako ke batumwa ba kwa Yesu. Twaya tumone kyalengejile’mba bebataye mu kaleya.

Papichiletu kimye kicheche kufuma kimye mupashi wazhila kyo aitulwijilwe pa baana ba bwanga ba kwa Yesu. Kabiji kino kyo kyamwekele: Ba Petelo ne Yoano bakatwelele mu nzubo ya Lesa mu Yelusalema pa kulemba juba. Byo bafikile kwipi na kibelo, kwajinga muntu umo kilema maulu mu bwikalo bwanji bonse. Bantu bamuletanga kuno pa juba pa juba pa kuba’mba alombenga mali ku batwelanga mu nzubo ya Lesa. Byo amwene ba Petelo ne Yoano, wibalombele’mba bamupepo bintu. Nga batumwa baubilepo ka?

Baimene saka bamutajisha uno mwanamulume muyanji. Petelo waambile’mba: ‘Mali mfwao, pakuba kyo nji nakyo, nsakwimupa. Mu jizhina ja Yesu, endai!’ Kepo Petelo amukwachile pa kuboko kwa kilujo, ne kumwimanya. Ne aye wakilukile, ne kwenda kaende. Bantu byo bamwene bino, bakuminye bingi ne kutemwa pa kino kya kukumya kyamwekele.

Petelo waambile’mba: ‘Ke ku bulume bwa Lesa, yenka wasangwile Yesu mu bafu, ko ko twaubila kino kya kukumya.’ Petelo ne Yoano byo bakyambilenga bino, bantangi ba bupopweshi bayishile. Bazhingijile bingi mambo Petelo ne Yoano babujilenga bantu pa mambo a kwa Yesu wasangwilwe mu bafu. Onkao mambo, bebakwachile ne kwibataya mu kaleya.

Juba jalondejilepo bantangi ba bupopweshi bapwijile pamo. Petelo ne Yoano, ne yewa muntu ye babukile bebaletele mukachi. Bantangi ba bupopweshi baipwizhe’mba: ‘Nanchi mu ñanyi bulume nangwa mu ñanyi jizhina mo mwaubila kino?’

Petelo wibambijile’mba, mu bulume bwa Lesa, yenka wasangwile Yesu kufuma ku bafu. Bañanga bakankelwe ne kya kuba, mambo kibakatezhe kukana kino kya kukumya kyawama. Onkao mambo, bajimwine batumwa amba kechi bakambe jibiji pe Yesu ne, kepo bebalekeleko amba baye.

Monka mu kuya kwa moba, batumwa batwajijile kusapwila pe Yesu ne kubuka bakolelwenga. Ino mbila ya pa mambo a bya kukumya yafikile monse monse. Ne mabumba a bantu bafumine mu mizhi yazhokolokele Yelusalema baletelenga balwazhi babo ku batumwa amba bebabuke. Kino kyazhingijishe bingi bantangi ba bupopweshi, onkao mambo bebakwachile batumwa ne kwibataya mu kaleya. Bino mukaleya kechi babanjilemo ne.

Kimye kya bufuku malaika wa Lesa washinkwile kinzhilo kya kaleya, byonka byo ubena kumona pa kikye kipikichala. Malaika waambile’mba: ‘Yainga, mukemane mu nzubo ya Lesa mukebambile bantu byambo byonse.’ Juba jalondejilepo kumakya, bantangi ba bupopweshi byo batumine bantu ku kaleya na kuleta batumwa, batainetu bafwamo. Kimye kikwabo, bano banabalume bataine batumwa mu nzubo ya Lesa saka bafunjisha. Kepo bebakwachile ne kwibatwala mu kije kya Saniedilini.

Bantangi ba bupopweshi bebambijile’mba: ‘Atweba twimukambizhizhe bingi, namba kechi mufunjishenga pe Yesu ne. Kabiji anweba mwakumbanya Yelusalema na mafunjisho enu.’ Batumwa bebakumbwile’mba: “Atweba twafwainwa kukokela Lesa kukila bantu.” Onkao mambo, batwajijile na kufunjisha “mambo awama.” Nanchi kino kechi kya kumwenako kyawama kyo twafwainwa kulondela nenyi?