TARA muengeli ogu ana zegurura muvero godorongo. Vagara ava ana kumangurura kuna kara vapositoli vaJesus. Tu tareni asi yinke yina va ninkisa va va ture modorongo.

Siruwogona tupu sina piti po kutunda apa mpepo zokupongoka va zi powomwenene varongwa vaJesus. Eyi yiyo nye yina horoka: Sitenguko simwe oPeturusa naJohanesa kuna kuza montembeli moJerusarema. Okwina, pepi nevero pana kara mugara ogu ga kara sirema eparu lyendi nalinye. Vantu kumureta apa nkenye ezuva yipo a ya hundagere yimaliva kwava vana kuza montembeli. Apa ana mono oPeturusa naJohanesa, ta va hundire asi va mu pe ko yuma. Yinke nava rugana vapositoli?

Tava sikama nokutara mugara ogu. Peturusa ta tanta asi: ‘Ame kutupu yimaliva, nye tani ku pe eyi nina kara nayo. Medina lyaJesus, katuka o gende!’ Peturusa makura ta kwata mugara kokuwoko korulyo, makura poopo ta vatuka nokugenda. Vantu apa vana yi mono eyi, tava tetuka nokuhafera unene sitetu sosiwa esi.

Peturusa ta tanta asi: ‘Ose kuna ruganene sitetu esi mononkondo daKarunga, ogu ga pindura Jesus koufe.’ Siruwo oso age naJohanesa vana kuuyunga ngoso, tapa wiza vampitisili vamwe womaukerelikarunga. Awo vana handuka morwa oPeturusa naJohanesa kuna kutantera vantu asi Jesus kwa mu pindura koufe. Makura tava va kwata nokuvatura modorongo.

Ezuva lyokukwama ko vampitisili womaukerelikarunga tava kara nepongo lyenene. Tava hwilida mo oPeturusa naJohanesa ntani nomugara ogu va verwire. Vampitisili womaukerelikarunga tava pura asi: ‘Nononkondo musinke komu rugene sitetu esi?’

Peturusa ta va tantere asi nononkondo daKarunga, ogu ga vhumbura Jesus koufe. Vapristeli kapi vana diva asi yinke nava rugana, morwa kapi tava vhuru kupatana asi sitetu sosiwa esi kapi kasi horokere. Makura tava rondora vapositoli asi kapisi va uyunge hena kuhamena Jesus, makura tava va sigi.

Ngomu gana kupita mazuva, vapositoli tava twikire kuzuvhisa kuhamena Jesus nokuverura vaveli. Mbudi zokuhamena yitetu eyi tazi lihana. Nonombunga domonodoropa edi da kundurukida Jerusarema tadi reta vaveli vawo kovapositoli va ya va verure. Eyi kwa zuvhisire vampitisili womaukerelikarunga mfudu, makura tava kwata vapositoli nokuvatura modorongo. Nye kapi vana kara mo siruwo sosire.

Masiku muengeli gwaKarunga ta zegurura evero lyodorongo, ngomu ono kuyimona apa. Muengeli ta tanta asi: ‘Zendeni mu ka sikame montembeli, nokukatwikira kukauyunga novantu.’ Ngurangura zokukwama ko, apa vampitisili womaukerelikarunga va tumine vagara kodorongo va ka hare vapositoli, vapositoli mutupu mo. Konyima vagara ava tava ka gwana vapositoli montembeli awo tava rongo, makura tava va twara kosinyanga sosigongi somasimbi.

Vampitisili womaukerelikarunga tava tanta asi: ‘Twa mu nyokera nawa-nawa asi mwa ha twikira kuronga kuhamena Jesus. Nye one muna zwida Jerusarema nerongo lyeni.’ Vapositoli tava limburura asi: ‘Ose twa hepa kulimburukwa unene Karunga, kupitakana vantu.’ Makura tava twikire kuronga “mbudi zongwa.” Nani kapisi sihonena sosiwa esi, esi natu kwama nose?

Yirugana magaununo 3 dogoro 5.