TALA o mbasi! Oziwidi kielo kia pelezo. Ana kavaikisi muna pelezo antumwa za Yesu. Yambula twavava zaya ekuma bakoteselwa muna pelezo.

Ke lumbu yayingi ko yavioka tuka alongoki a Yesu babungulwilwa mwand’avelela, vabwidi diambu: O Petelo yo Yoane, bele muna tempelo oku masika. Van’evitu dia tempelo bawene muntu wakala ye kimbevo kia malu tuka kawutukila. Nkangu wantwasanga lumbu yawonso kalombanga tukau twankenda kw’awana bakotanga muna tempelo. Vava kamona Petelo yo Yoane se bekota muna tempelo, olombele lukau. Adieyi bevanga antumwa?

Baningamene, bantungunwini. O Petelo umvovese vo: ‘Kina ye nzimbu ko, ikuvana eki ngina kiau. Muna nkumbu a Yesu telama yo diata.’ Unsimbidi muna koko kwalunene, otelamene, odiete. Vava nkangu bamwene mama basivikidi kikilu yo mona e kiese mu kuma ki’esivi diadi divangamene.

O Petelo ovovele kwa nkangu vo: ‘Muna nkum’a Nzambi ona wafula Yesu muna mafwa i tuvangidi esivi diadi.’ Ekolo Petelo yo Yoane bavovanga, ambuta za nganga babaluakidi. Bayisawidi wau balongele nkangu, yo teleka mfuluk’a Yesu muna mafwa. Babakangidi yo kubasia muna pelezo.

Muna mene-mene ambuta za nganga balungalakene muna Yerusaleme. Babokelese Petelo, Yoane yo muntu ndiona wawukwa. Bayuvwidi antumwa vo: ‘Mu nkuma anani nuvangìdi esivi diadi?’

O Petelo ubavutwidi vo muna nkum’a Nzambi ona wafula Yesu Kristu muna mafwa. Ke bavwidi owu wa vanga ko, kadi ke balendi vunisa esivi divangamene ko. Ozevo, babayambwidi yo kubakanikina vo ke balongela diaka muna nkumbu a Yesu ko.

Antumwa bakwamanana longela muna nkumbu a Yesu ye wuka wantu. E nsangu za masivi mama zimwanganene. Wantu batukanga muna mavata mazietele Yerusaleme, batwese mbevo zau kwa antumwa, babawukidi. Ambuta za nganga bazele ye kimpala. Babakidi antumwa, babasidi muna pelezo. Kansi, ke bakala mo mu kolo kiayingi ko.

O mbasi a Yave wizidi o fuku. Oziwidi yelo ya pelezo nze una omwene vava. Ubavovese vo: “Nwenda, nwatelama, nwavova kwa nkangu muna tempelo.” O kuma vava kwakia, ambuta za nganga batumini wantu kuna pelezo batwasa antumwa, o makesa bele, ke babawene mu pelezo ko. Babawene muna tempelo, belongelanga nkangu, babatwese kuna mbazi a nkanu.

Ambuta za nganga babavovese vo: “Kanikina twanukanikina vo ke nulongela muna nkumbu yayi ko; nuvwidi zadisa Yerusaleme y’elongi dieno.” Antumwa bavutwidi vo: ‘Tulemvokela Nzambi nze nyadi, ke mu wantu ko.’ Ozevo, bakwamanana samuna nsangu “zambote.” Nga ke yau ko i mbandu ambote tufwete tanginina?