HETA tan in kawngka chelha hawhgtu vantirhkoh hi en teh. A chhuahtir mite hi Isua tirhkohte an ni. Engin nge tan inah tantir i en ang u.

Isua zirtirte chunga thlarau thianghlim leih a nih achin ala rei lo va. Tin hei hi a lo ni ta a: Chawhnu vawi khat Jerusalem-a biak inah Petera leh Johana an kal a. Chutah chuan kawngka bulah mi pakhat, a dam chhung zawng zawnga zeng a awm a. Biak ina lutte hnena tangka a dil theih nan miten hetah hian ni tin an rawn zawn thin a. Petera leh Johana a hmuhin engemaw pe turin a dil a. Tirhkohte chuan enge an tih ang?

An ding a, mi rethei chu an en a. ‘Tangka ka nei lo va, mahse ka neih chu ka pe ang che. lsua hmingin, tho la kein kal rawh!’ Peteran a ti a. Tin a kut ding lamah Peteran a chelh a, a zuang tho va, kein a kal ta nghal a. Mipuiin chu chu an hmuhin mak an tiin, chu thilmak avang chuan an hlim em em a.

‘Mitthi zing ata Isua kaithotu Pathian thiltihtheihnain a ni he thilmak hi kan tih ni,’ Peteran a ti a. Amah leh Johanan an sawi lai mekin, sakhaw hruaitu thenkhat an lo kal a. Petera leh Johanan mitthi zing ata Isua kaihthawh a nih thu mipui an hrilh avangin an thinur a. An man a, tan inah an khung a ni.

A tukah chuan sakhaw hruaitute chuan inkhawmna ropui tak an nei a. Petera leh Johana chu, an mi tihdam nen an rawn hruai lut a. Sakhaw hruaitute chuan: ‘Eng thiltihtheihnain nge he thilmak hi in tih?’ tiin an zawt a.

Mitthi zing ata Isua kaithotu Pathian thiltihtheihnain a ni tih Peteran a hrilh a. He thilmak mak tak hi a lo nih tak tak an hnial theih si loh avangin, puithiamte chuan tih ngaihna an hre lo va. Chuvangin Isua chanchin sawi leh tawh hlek lo turin tirhkohte chu an vaukhan a, an kaltir ta a.

Nite a ral zel a, tirhkohte chuan Isua chanchin an hril zel a. Chung thilmak chanchinte chu a darh zel a. Tichuan Jerusalem vel khaw lian deuh atang tein tirhkohte tihdam turin mipuiin damlote an rawn hruai a. Chu chuan sakhaw hruaitute a thiktir a, tichuan tirhkohte chu an man a, tan inah an khung a. Mahse chutah chuan an awm rei lo.

Zanah Pathian vantirhkohvin, heta i hmuh ang hian, tan in kawngka a hawng a. Vantirhkoh chuan: ‘kal ula, biak inah va ding ula, mipui hnenah sawi zel rawh u,’ a ti a. A tukah, sakhaw hruaituten tirhkohte ko tura tan inah mi an tirhin an awm tawh lo va. A hnuah mite chuan biak ina zirtirin an hmu a, Sanhedrin Hall-ah an hruai a.

Sakhaw hruaitute chuan: ‘Isua chanchin zirtir tawh hlek lo turin thu kan pe tawh che ua. Mahse in zirtirnain Jerusalem in tihkhah tak hi,’ an ti a. Tirhkohte chuan: ‘Roreltuah mihring aiin Pathian kan zawm zawk tur a ni,’ an ti a. Tichuan “chanchin tha“ an zirtir zel a. Chu chu kan zui atana entawna tha a ni lawm ni?