Libere Par Enn Anz Dan Prizon
Zistwar 106
Libere Par Enn Anz Dan Prizon
GET sa anz ki pe ouver laport prizon la. Sa bann zom ki li pe libere la se bann zapot Jésus. Anou gete ki’nn arive pou ki zot inn al dan prizon.
Pa fer tro lontan depi ki bann disip Jésus ti gagn lespri sin. Ek ala seki finn arive: Enn lapremidi Pierre ek Jean pe al dan tanp dan Jérusalem. La, pre kot laport, ena enn misie ki andikape depi so nesans. Bann dimounn amenn li la toulezour pou ki li kapav demann sarite ar bann ki vinn tanp. Kan li trouv Pierre ek Jean, li demann zot sarite. Ki bann zapot pou fer?
Zot arete ek zot get sa misie pov la. Pierre dir: ‘Mo pena kas, me mo pou donn twa seki mo ena. Lor nom Jésus, leve ek marse!’ Lerla, Pierre trap sa misie-la so lame drwat, ek enn sel kout li debout lor so lipie ek li koumans marse. Kan bann dimounn trouv sa, zot gagn sok ek zot bien kontan akoz sa mirak extraordiner la.
Pierre dir: ‘Nou finn fer sa mirak-la par pouvwar Bondie, ki’nn resisit Jésus.’ Pandan ki li ek Jean pe koze, de-trwa sef relizie vini. Zot ankoler parski Pierre ek Jean pe dir bann dimounn ki Jésus inn resisite. Alor, zot trap bann zapot ek met zot dan prizon.
Landemin, bann sef relizie fer enn gran renion. Zot fer amenn Pierre, Jean, ek osi sa misie ki zot ti geri la. Bann sef relizie demande: ‘Par ki pouvwar zot inn fer sa mirak-la?’
Pierre dir zot ki se gras-a pouvwar Bondie, sa mem pouvwar ki ti resisit Jésus la. Bann pret pa kone ki pou fer, parski zot pa kapav demanti ki sa mirak extraordiner la vremem inn arive. Alor, zot averti bann zapot pou pa koz lor Jésus ankor, ek lerla, zot les bannla ale.
Amezir ki bann zour pase, bann zapot kontign prese lor Jésus ek geri bann malad. Nouvel lor sa bann mirak-la fane partou. Mem bann lafoul dan bann lavil otour Jérusalem amenn bann dimounn malad pou ki bann zapot geri zot. Sa fer bann sef relizie bien zalou, alor, zot trap bann zapot ek met zot dan prizon. Me zot pa res lontan dan prizon.
Pandan lanwit, anz Bondie ouver laport prizon kouma to kapav trouve isi. Anz-la dir: ‘Ale ek debout dan tanp, ek kontign koz avek bann dimounn.’ Landemin gramatin, kan bann sef relizie avoy bann zom pou amenn bann zapot, zot nepli la. Plitar, sa bann zom-la trouv zot pe ansegne dan tanp ek zot amenn bannla dan lasal Sanhédrin.
Bann sef relizie la dir: ‘Nou ti bien donn zot lord pou pa ansegn lor Jésus ankor. Me zot finn ranpli Jérusalem ar zot bann lansegnman.’ Apre sa, bann zapot reponn: ‘Nou bizin obeir Bondie kouma enn sef plito ki bann zom.’ Alor, zot kontign ansegn “bon nouvel.” Eski sa pa enn bon lexanp pou nou swiv?
