Silak Watla Wina Pri Taki Bangwan
Sturka 106
Silak Watla Wina Pri Taki Bangwan
KAIKI KAIS insal kum silak watla durka ba param kwaki bri ba. Jisas apastilka nani ra silak wina sakisa. Kaisa dia muni silak ra bangwi kan sapa kaikaia.
Disaipel nani ra spirit wal laikan ba wina pyu wiria baman luan kan. Bara baha pyua nani ra, naha ba taki kan: Pita, Jan wal tutni kum Jerusalem tempelka ra wan. Bara dur lama ba ra waitna kum ai rayaka aiskara skahwa kan ba bara kan. Upla nani mita witin ra yu bani baha ra brihwi kan, tempel bilara dimi wi kan nani ra lalah makabi kabia dukyara. Bara Pita, Jan wal ra kaikan taim, witin nani ra sin lalah makaban. Sakuna witin nani dia daukan luki?
Witin nani takaski waitnika ba ra kaikisi, Pita bila: ‘Yang lalah lika apu sna sakuna yang dia brisna ba man ra maikamna.’ Bara Pita bui waitnika mihta aihkika ra alki win: ‘Jisas nina ra mai wisna bui waps!’ Bara witin minitka ra ai mina ra pâli bui mahka wapan. Naha sainka daukan ba dukyara upla ailal sirang iwi lilia taki bangwan.
Bara Pita mita witin nani ra win naha na Gâd karnika sa, bara naha karnika wal sika Jisas ra pruan wina kli bukan ba bara naha karnika wal sika yang nani sainka na dauki bangwri ba. Witin kau Jan wal aisi kan bara, rilidian lalka nani kum kum balan. Bara witin nani ba ai kupia sauhki bangwan, kan Pita, Jan wal upla nani ra Jisas ba pruan wina kli bukan ba dukyara smalki kan ba mita. Baha daukan ba dukyara witin nani ra alki silak ra mangkan.
Yu wala ra, rilidian lalka nani ba asla takanka tara kum brih bangwan. Bara Pita, Jan bara waitna rakan kan ba ra witin nani mawanra bribal muni makabi walan: ‘Man nani dia karnika wal raki bangwram ki?’
Bara Pita pana win: ‘Gâd karnika Jisas ra pruan wina bukan ba wal dauki bangwri.’ Prîst nani ba dia dauki bangwaia sapa nu apu kan, kan baha sainka daukan kan ba witin nani sip kunin wiras kan. Baha mita witin nani apastil nani ra pâli lawi muni, Jisas nina ra kau smalki bangwi kabia apia win. Baha ningkara witin nani ra swin wan.
Sakuna pyu nani ba lui kan bara, apastil nani ba ban Jisas dukyara smalki upla siknis nani ra raki tauki kan. Sainka nani dauki kan ba dukyara plis aiskara wali kan. Baha mita upla ailal Jerusalem lamara iwi kan nani ba, upla siknis nani ba apastil nani ra bribal kan rakbia dukyara. Bara rilidian lalka nani ba naha dukyara tumi, apastil nani ra alki silak ra mangkan. Sakuna baha yua ra diara aihka kum takan.
Tihmia, Gâd insalka ba mita silak watla durka ba kwakan, man nara kaikisma ba baku. Bara insal ba witin nani ra win: ‘Wih tempel ra bui upla nani ra ban aisi bangwi bas.’ Bara yu wala rilidian lalka nani ba apastil nani mata blikan, sakuna wih bangwan taim, witin nani ba apu kan. Bara yu wala witin nani ba tempel ra smalki bangwi kan taim, alki lâ dadaukra nani mawanra brihwan.
Bara rilidian lalka nani ba mita witin nani ra win: ‘Yang nani adar maiki bangwri kau Jisas dukyara smalki bangwi kama apia, sakuna man nani smalkankam wal Jerusalem na bangkram sa.’ Sakuna apastil nani bila: ‘Gâd ra wan wihta baku bila wali bangwaia sna upla nani bila walaia watlika ra.’ Baha wina, witin nani ban smalki bangwi kan. Nahki daukanka na tanka pain kum sa yawan dukyara!
