Okiskej itech telpiloyan
TLAPOUALISTLI 106
Okiskej itech telpiloyan
XIKITA nin ángel akin kitlapojtok ikaltlatsakuil telpiloyan. Kinmakixtijtok itlatitlaniluan Jesús. Ma tikitakan tleka otsaktokaj.
Ayamo miak kauitl opanok ijkuak imachtijkauan Jesús okiselijkej espíritu santo. Uan nin tlen opanok: tlatitlanil Pedro uan tlatitlanil Juan se tiotlak oyajkej itech teokali tlen okatka Jerusalén. Ompa, inauak kaltlatsakuil, okatka se tlakatl tlen amo ueli onejnemiaya itech nochi iyolilis. Tlaltikpaktlakamej ompa okiuikaya mojmostla pampa okintlajtlaniliaya tomin akinmej oyayaj teokali. Ijkuak okinmitak tlatitlanil Pedro uan tlatitlanil Juan, ye okintlajtlanili itlaj ma kimakakan. ¿Tlen kichiuaskiaj yejuan?
Omoketskej uan okitakej. Pedro okilui: ‘Amo nikpia tomin, maski ijkon, nimitsmakas san tlen nikpia. ¡Ika itoka Jesús, ximoketsa uan xinejnemi!’. Ijkuakon, Pedro okikitskili iyekma non tlakatl uan san niman omoketikiski uan opejki nejnemi. Non ueyi milagro okintlajtlachialti uan okinyolpakti tlaltikpaktlakamej.
Pedro okijto: ‘Nin milagro otikchijkej ika ichikaualis toTajtsin Dios akin okiyoliti Jesús’. Ijkuak tlatitlanil Pedro uan tlatitlanil Juan ok otlajtoayaj, sekimej tlayekankej teopixkamej oyajkej ompa. Okualantokaj pampa tlatitlanil Pedro uan tlatitlanil Juan okijtojkej toTajtsin Dios okiyoliti Jesús. Ik non, okinkitskijkej uan okintsakej.
Mostlatika, tlayekankej teopixkamej omonechikojkej. Uan inmixpan okinuikakej Pedro, Juan uan tlakatl tlen yejuan okipajtijkej. Okintlajtlanijkej: ‘¿Ika tlen chikaualistli onankichijkej nin tlamantli?’.
Pedro okijto ika ichikaualis toTajtsin Dios, akin okiyoliti Jesús. Teopixkamej amo okimatiayaj tlen kichiuaskiaj, pampa kuali okimatiayaj melauak omochi non milagro. Ik non, okinmiluijkej tlatitlaniltin ayakmo ma tetlapouikan itech Jesús, uan okinkajkajkej.
Opanokej tonalmej, uan tlatitlaniltin ok otetlapouiayaj itech Jesús uan okinpajtiayaj akinmej omokokoayaj. Ninmej tlamantli omoxitini itech miakej altepemej. Ik non, sapanoa miakej tlaltikpaktlakamej tlen ochantiayaj itech oksekimej altepemej oyajkej Jerusalén kanin okatkaj tlatitlaniltin pampa ma kinpajtikan nochtin tlen omokokoayaj. Ik non, tlayekankej teopixkamej, okinnexikolitakej uan okinkitskijkej tlatitlaniltin. Ijkuakon, itlaj opanok.
Ipan yoak, iángel toTajtsin Dios okitlapo ikaltlatsakuil telpiloyan, ken tikita nikan itech tlaixkopinal. Ángel okinmilui: ‘Xiakan uan ximoketsakan itech teokali uan ok xikintlapouikan tlaltikpaktlakamej’. Mostlatika, ijkuak tlayekankej teopixkamej otlanauatijkej ma kinuikakan tlatitlaniltin, amo okinmajsikej. Satepan, okinmajsikej itech teokali uan okinuikakej kanin omonechikoaya Sanedrín.
Tlayekankej teopixkamej okijtojkej: ‘Otimechnauatijkej ayakmo xitetlapouikan itech Jesús. Maski ijkon, yonankixitinijkej namotlamachtilis itech nochi Jerusalén’. Tlatitlaniltin okijtojkej: ‘Moneki tiktlakamatiskej toTajtsin Dios uan amo tikintlakamatiskej tlaltikpaktlakamej’. Uan yejuan ok otetlapouijkej itech Jesús. ¡Se kuali neskayotl!
