Ekitebyo 106

Baarekurwa Kuruga omu Kihome

REEBA maraika aha aigwire orwigi rw’ekihome. Abashaija abu ariyo naiha omu kihome n’entumwa za Yesu. Ka twetegyereze ekyabareetaire okuteebwa omu kihome.

Hahweireho omwanya mukye okwiha obu omwoyo orikwera yaashukwa aha beegi ba Yesu. Kandi eki nikyo kyabaireho: Petero na Yohaana omu ihangwe rimwe bakaba nibaza omu hekalu omuri Yerusaalemu. Aho, haihi n’omuryango, hariho omushaija owaazairwe azingami. Buri-izooba abantu nibamwegura bamureeta aha kushabiiriza empiiha kuruga aha bantu abarikwija omu hekalu. Ku yaareebire Petero na Yohaana, yaabashaba ngu bagire aku baamuha. Entumwa niziza kukora ki?

Beemerera bamutaho amaisho. Petero agira ati: ‘Empiiha zo tinziine, kwonka eki nyine nikyo ndikuza kukuha. Omu iziina rya Yesu, imuka ogyende!’ Petero amukwata omukono gwa buryo, amwimutsya kandi ahonaaho aguruka kandi atandika kugyenda. Abantu ku bareeba eki, batangaara munonga kandi bashemererwa munonga ahabw’eky’okutangaaza eki.

Petero agira ati: ‘N’ahabw’amaani ga Ruhanga, owaazoire Yesu kuruga omu bafu, kugira ngu twabaasa kukora eky’okutangaaza eki.’ Petero na Yohaana ku baabaire bakirikugamba, bamwe aha beebembezi b’ediini baija. Baitwa ekiniga ahabw’okuba Petero na Yohaana bariyo nibagambira abantu ebirikukwata aha kuzooka kwa Yesu kuruga omu bafu. N’ahabw’ekyo babakwata kandi babata omu kihome.

Ekiro ekyakuratiireho, aba beebembezi b’ediini bagira orukiiko ruhango. Petero na Yohaana, hamwe n’omushaija owaatambirwe, babareeta omu rukiiko. Abeebembezi b’ediini babuuza bati: ‘Mwine bushoboorozi ki kukora eky’okutangaaza eki?’

Petero abagambira ngu n’ahabw’amaani ga Ruhanga, owaazoire Yesu kuruga omu bafu. Abanyamurwa tibarikumanya eky’okukora, ahakuba buzima tibarikubaasa kwehakana eky’okutangaaza eki ekyabaho. N’ahabw’ekyo batiinatinisa entumwa okutagaruka kugamba ahari Yesu, kandi babarekura bagyenda.

Ebiro ku bihinguraho, entumwa ziguma nizibuurira ahari Yesu kandi nizitambira abarwaire. Amakuru garikukwata aha by’okutangaaza ebi gajanjaara. Kandi hoona abantu baingi kuruga omu ndembo ezetoroire Yerusaalemu bareeta abarwaire ngu abeegi babatambire. Eki kireetera abanyamurwa kugira eihari, n’ahabw’ekyo baajandura abeegi kandi baabata omu kihome. Kwonka tibaramaziremu omwanya muraingwa.

Omu kiro, maraika wa Ruhanga aigura orwigi rw’ekihome, nk’oku orikureeba aha. Maraika agira ati: ‘Mugyende kandi mwemerere omuri hekalu, mugume nimubuurira abantu. Omu kasheeshe abeebembezi b’ediini boohereza abashaija okureeta entumwa kubaiha omu kihome, bashanga batariyo. Bwanyima babashanga nibeegyesa omuri hekalu batyo babareeta omu ishengyero.

Abeebembezi b’ediini babagira bati: ‘Tukabaragiira okutagaruka kwegyesa ebirikukwata ahari Yesu ogundi murundi. Kwonka mwijwize Yerusaalemu n’enyegyesa yaanyu.’ Entumwa zigarukamu ziti: ‘Tushemereire kworobera Ruhanga nk’omutegyeki okukira abantu.’ N’ahabw’ekyo bagumizamu nibeegyesa “amakuru marungi.” Ekyo t’eky’okureeberaho kirungi eki twine kukuratira?

Ebyakozirwe eshuura 3 okuhika 5.