CHAWILAMPEʼ wajun ángel che utorom uchiʼ ri tzʼapibʼal. Tijan keʼuresaj lo ri täq apóstoles rech ri Jesús. Chqilampeʼ suche xetzʼapixik.

Qʼaxnäq chi kebʼ oxibʼ qʼij che xtaq lo ri ixlabʼixel pa kiwiʼ ri täq rajtijoxel ri Jesús. Are wariʼ xbʼantajik: Pedro xuqujeʼ Juan xebʼe pa ri loqʼalaj ja rech Jerusalén chiʼ xbʼe ri qʼij. Chilaʼ, naqaj che uchiʼ ja, kʼo jun achi che kamnäq ubʼaqil ojer chik. Ri winaq kkekʼam bʼi chilaʼ ronojel qʼij rech kuta pwäq chike ri keʼok bʼi pa ri loqʼalaj ja. Chiʼ xril ri Pedro xuqujeʼ ri Juan, xuta pwäq chike. ¿Sulaʼ kkebʼan kimik?

Xkilo xuqujeʼ xetakʼeʼk. ‹Kʼot nupwäq›, xchaʼ Pedro, xaq xiw kinya chawe ri kʼo wukʼ. ¡Pa ubʼiʼ ri Jesús, chatwaljoq tekʼuriʼ chatbʼinoq!› Tekʼuriʼ Pedro xuchap che uqʼabʼ ri achi, tekʼuriʼ che jun chʼopinik xtakʼeʼk xok pa bʼinik. Wajun milagro xkil ri winaq xekikotik rumal.

‹Are ri uchoqʼabʼ ri Ajawaxel, jachin laʼ xuwalasaj ri Jesús, che xojkunik xqabʼan wajun milagro›, xchaʼ Pedro. Chiʼ Pedro xuqujeʼ ri Juan tijan kechʼawik, xepe nikʼaj ajkʼamal bʼe. Petinäq koyowal, o kiwal, rumal che Pedro xuqujeʼ Juan xkebʼij chike ri winaq che ri Jesús xkʼastajik. Rumal laʼ xechapik xuqujeʼ xetzʼapixik.

Che ukabʼ qʼij ri täq ajkʼamal bʼe xkebʼan jun nimalaj riqbʼal ibʼ. Xekʼam lo che kiwäch, ri Pedro xuqujeʼ ri Juan xuqujeʼ ri achi che xkunaxik. ‹¿Su choqʼabʼ xikoj che ubʼanik wariʼ?› Xechaʼ.

Pedro xubʼij che are rumal ri uchoqʼabʼ ri Ajawaxel, ri xwalasan ri Jesús. Ri täq ajkojol tabʼal toqʼobʼ ketaʼm täj su kkebʼano, rumal che kekun täj kkebʼij che wajun utzalaj milagro xbʼan täj. Rumal laʼ, xkebʼij chike ri täq apóstoles che xaq mixchʼaw chi chirij ri Jesús, tekʼuriʼ kyaʼ chike xebʼek.

Xeqʼax ri täq qʼij, tekʼuriʼ ri täq apóstoles xkeya ta kan ubʼixik chirij ri Jesús xuqujeʼ xkekunaj ri täq yawabʼ, o iwabʼ. Konojel xketaʼmaj chirij wa täq milagros. Rumal laʼ kʼi täq winaq rech nikʼaj chik tinamit e kʼo che unaqaj Jerusalén xkekʼam lo täq yawabʼ rech ri täq apóstoles kkekunaj. Rumal waʼ ri täq ajkʼamal bʼe, itzel xkenaʼo rumal laʼ xketzʼapij ri täq apóstoles. Tekʼuriʼ kʼo jun xbʼantajik.

Pa chaqʼabʼ, ri uʼangel ri Ajawaxel xutor uchiʼja rech ri tzʼapibʼal, chawilampeʼ pa ri wachbʼäl. Ri ángel xubʼij: ‹Jix chixtakʼel pa ri loqʼalaj ja tekʼuriʼ xaq miya kan ubʼixik chirij Jesús›. Che ukabʼ qʼij, chiʼ ri täq ajkʼamal bʼe xekitaq kikʼamik ri täq apóstoles, e kʼo ta chi chilaʼ. Tekʼuriʼ xkeriq pa ri loqʼalaj ja tekʼuriʼ xekʼam bʼi pa Sanedrín.

‹Xaq mixchʼaw chirij ri Jesús›, xechaʼ wa täq ajkʼamal bʼe. ‹Ix inojisam ri Jerusalén che ri täq ikʼutunik.› Ri täq apóstoles xkebʼij wariʼ: ‹Rajawaxik kqanimaj ri Ajawaxel che qʼatbʼaltzij are ta kqanimaj ri winaq›, xechaʼ. Tekʼuriʼ xkeya ta kan ubʼixik chirij ri Jesús. ¡Wariʼ jun utzalaj kʼutbʼal chaqe!