USURU mini saanqa fananni noo sokkaancho lai. Sokkaanchu usuru mininni fushshanni noori Yesuusi hawaariyaateeti. Insa usurantanno gede assinonsahu maatiro hanni laˈno.

Yesuusi rosaanora qullaawu ayyaani dirrinku shiima yannalla saˈino. Hakkunni gedensaanni mayi kalaqamikka? Mitto barra Pheexiroosinna Yohaannisi Yerusaalame Maganu minira hadhu. Martanno wote, ilaminku kayise laanshaawinohu mittu manchi nafara no. Maganu minira daanno manna woxe huucciˈranno gede, barru baala mannu iso duhe hakka abbanno. Isi Pheexiroosinna Yohaannisi laiti, woxe uyitasira huucciˈri. Kuri lamu hawaariyaate ma assitukka?

Insano uurrite konne buxichcho mancho laˈu. Hakkiinnino Pheexiroosi togo yiisi: ‘Woxu dinoe; nooere kayinni eemmohe. Yesuusi suˈminni gotti yite haˈri!’ Hakkiinnino Pheexiroosi qiniitichcho angasinni amadisi; manchuno kubbe kae haˈrami. Mannu tenne laiti, lowo geeshsha xagge assiri; qoleno tenne maalalenni hagiidhi.

Pheexiroosino togo yii: ‘Ninke tenne maalale assinoommohu, Yesuusa reyotenni kayisino Magani wolqanniiti.’ Isinna Yohaannisi tenne coyidhanni heedheenna, ammaˈnote cimeeyye daggu. Pheexiroosinna Yohaannisi Yesuusi reyotenni kainota mannaho kultanni noo daafira, cimeeyye hanqitu. Hakkiinnino amadde usuru minira eessitunsa.

Layinki barra ammaˈnote cimeeyye songo songitu. Tini cimeeyye Pheexiroosinna Yohaannisi insa hursitu manchi ledo songonsawa abbitu. Hakkiinnino, ‘Tenne maalale assitinannihu mayi wolqanniiti?’ yite lamenka xaˈmitu.

Tenne maalale assitinohu Yesuusa reyotenni kayisino Magani wolqanni ikkinota Pheexiroosi kulinsa. Kuri kakkalaano tini hagiirsiissanno maalale ikkitinota kaada dandiitannokki daafira, assitannori bainsa. Konni daafira lamenka layinkita Yesuusire coyidhinoonte yite haˈrissunsa.

Barru lexxanni haˈri kiiro hawaariyaate Yesuusire farciˈranna xiwantinore hursa diagurtino. Assitino maalale duduwi gobba baala iilli. Konni daafira Yerusaalamete qooxeessira noo katammanni lowo manni xiwamino manna hursitanno gede hawaariyaatenniwa abbi. Ammaˈnote cimeeyye konninni hinaasse, hawaariyaate amadde usuru minira eessitu. Ikkollana hawaariyaate usuru mine lowo yanna dikeeshshitino.

Koye misilete aana laˈˈattonte gede, hashsha Maganu sokkaanchi daye usuru mini saanqa fani. Sokkaanchuno togo yiinsa: ‘Hadhine Maganu mine uurritine, konne qaale mannaho kulle.’ Layinki soodo ammaˈnote cimeeyye hawaariyaate abbanno gede manna sokkanno wote, insa fulte kaˈino. Hakkiinnino sonki mannooti hawaariyaate Maganu mine rosiissanna affe, Sanihediriini yinanni songo hoowe abbitu.

Ammaˈnote cimeeyye hawaariyaate togo yitunsa: ‘Layinkita Yesuusire rosiissinoonte yine seekkine kulloommoˈne. Kiˈne kayinni rosoˈne Yerusaalame wonshitini.’ Hawaariyaateno, ‘Ninke mannunni roore Maganoho hajajama hasiissannonke’ yite qoltu. Konni daafira “dancha duduwo” mannaho kulansa diagurtino. Kuni ninkera dancha lawishsha diˈˈikkino?