Tantara 106

Naboake Baka Am-pigadrà Ao

MBA henteo moa anjele mamòha varavara trano figadrà io. Apostolin’i Jesosy lahilahy naboakine bakao reo. Ndao hianarantsika ty antone nanaòva lahilahy reo am-pigadrà ao.

Vo tsy ela zay ty fotoa nandatsahan’i Jesosy fanahy masy tamy mpianatsine reny. Ka zao ty raha niseho: nandeha tamy tempoly ta-Jerosalema tao Petera noho Jaona ndraike hariva. Nisy lahilahy nalemy liane naha olo aze zay ty tao; nipetrake marinike varavara tempoly io. Nandesin’olo teo lahilahy io isan’andro, soa afake hangatake drala ami’ze olo avy amy tempoly ao. Laha fa nahita an’i Petera noho Jaona ie, le nangatake amin-droze mba hanome raha aze. Ino ty raha nataon’apostoly reo?

Nijàno roze ka nanenty soa lahilahy mahantra io. ‘Tsy manan-drala aho’, hoy ty asan’i Petera, ‘fa hameako anao ze raha ananako. Amy anaran’i Jesosy, mitsangàna iha, ka mandehàna!’ Norambesin’i Petera tamy tanane ankavàna lahilahy io, ka tampotampoke teo ie le nitsanga soa ka nanomboke nandeha ami’zay. Laha fa nahita raha zay ty olo, le nitserike biby, sady faly tamy fahagagà soa io.

Hoy ty asan’i Petera hoe: ‘Baka amy heri-Ndranahare, aze namelo an’i Jesosy tamy maty iny, ro anaòvanay fahagagà zao.’ Niavy teo mpitarike fivavàha reny, tamy fotoa nivolànan’i Petera noho Jaona io. Neloke bibike roze, satria niresake tamin’olo mikasike ty fanangàna an’i Jesosy tamy maty Petera noho Jaona. Nosamborin-droze ami’zay Petera noho Jaona, ka nogadràn-droze laha fa bakeo.

Nanao fivoriam-be ty mpitarike fivavàha laha fa hamarain’iny. Nandesy tamin-droze teo Petera noho Jaona, miarake amy lahilahy nalemy taloha iny. ‘Herin’ia ro anaòvanareo fahagagà zao?’, hoy ty asa mpitarike fivavàha reny nanontany.

Nivòla tamin-droze Petera fa ty heri-Ndranahare, ro namelo ndraike an’i Jesosy tamy maty. Tsy hita mpisoro reny ty raha hataon-droze, satria roze mihitsy ro nahita maso fahagagà io, sady raha nisy vatane raha io. Ka le nohafatsafàrin-droze maré apostoly reny, mba tsy hiresake mikasike an’i Jesosy ndre aìa ndre aìa; ndre amin’ia ndre amin’ia. Nengàn-droze handeha ami’zay apostoly reny laha fa bakeo.

Laha fa nandeha ty fotoa, le mbo nitory mikasike an’i Jesosy avao apostoly reny sady nanafake aretin’olo maro. Niparitake ty vaovao mikasike fahagagà reo. Ka maro ty vahoake nipetrake tamy tany manodidy an’i Jerosalema tao ro nanday ze longon-droze marary mba hotahàn’apostoly reo. Nahavy ty mpitarike fivavàha hialo apostoly reo raha zay, ka nosamborin-droze ndraike apostoly reny le nogadrà. Fe tsy ela ty nijanonan-droze tam-pigadrà tao.

Nisy namòha ty varavara trano figadrà iny tamy andro haly. Anjele-Ndranahare ty namòha aze, arake ty hitanao amy sary eo io. Hoy ty asan’anjele iny: ‘Ndahàna nareo, ka mitsangàna amy tempoly eo; mazotoa miresake amy vahoake reo.’ Laha fa nanirake lahilahy hangalake apostoly reny tam-pigadrà tao mpitarike fivavàha reny, hamaray maraindray, le fa tsy hita tao sasy roze. Nihita lahilahy reo nampianatse tamy tempoly tao apostoly reny, laha fa tafara atoy, ka nandesin-droze tamy trano Fitsarà Anabo Jiosy tany.

‘Fa nandrara anareo tsy hampianatse raha mikasike an’i Jesosy zao zahay’, hoy ty asa mpitarike fivavàha reny. ‘Fe, fa nofenoanareo fampianara io Jerosalema manontolo.’ Namaly apostoly reny laha fa bakeo hoe: ‘Andranahare ro atahòranay mihoatse ty olo.’ Ka le nanohy nampianatse ty “vaovao soa” avao roze. Tsy ohatse soa tokone harahintsika kea va raha zay?

Asan’ny Apostoly toko faha-3 zisiky amy toko faha-5.