ASE ubuke lengilosi, ivule umnyango wasejele. Lamadvodza lewakhululako, abaphostoli baJesu. Ase sitfole kutsi yini lebangele kutsi afakwe ejele.

Sekwendlule sikhashana nje bafundzi baJesu behlelwe ngumoya longcwele, naku lokwase kuyenteka: BoPhetro naJohane baya ethempelini eJerusalema sekunguntsambama. Lapha eceleni kwemnyango welithempeli, kwakukhona indvodza letsite leyayisishosha seloku yatalwa. Onkhe malanga bantfu bebayetfwala bayibeke lapho kuze icele imali kulabo labete ethempelini. Yatsi nayibona boPhetro naJohane, yacela kutsi nabo bayiphe nobe ngabe yini labangahle bayiphe kona. Bebatawenta njani labaphostoli?

Bayibukisisa. Phetro watsi kuyo: ‘Anginamali, kodvwa ngitakunika loko lenginako. Ngeligama laJesu ngitsi kuwe sukuma uhambe!’ Wase sewuyibamba ngesandla sangesekudla wayisukumisa. Kwekucala ngca ephilweni yayo yasukuma yagcuma, futsi yacala kuhamba. Nabakubona loku bantfu, bamangala kakhulu futsi bajabula ngalesimangaliso.

Phetro watsi: ‘Ngemandla aNkulunkulu lowavusa Jesu ekufeni, lawa labangele kutsi sente lesimangaliso.’ Basakhuluma boPhetro naJohane, baholi benkholo beta kubo. Bebatfukutsele kakhulu ngoba boPhetro naJohane bebaloku bafundzisa bantfu ngaJesu lovusiwe. Ngako babatsatsa babafaka ejele.

Ngakusasa labaholi benkholo babamba umhlangano lomkhulu. Bayala kutsi boPhetro naJohane kanye nalendvodza lelashiwe baletfwe nabo kulomhlangano. Bababuta: “Loku nikwente ngamaphi emandla?”

Phetro wabatjela kutsi bakwente ngemandla aNkulunkulu lowavusa Jesu ekufeni. Labaphristi behluleka kutsi batawutsini, ngoba bebangeke baphike kutsi lesimangaliso lesihle kangaka sentekile. Ngako bayala baphostoli kutsi bangaphindzi bakhulume ngeligama laJesu, babese bayabakhulula, futsi babayekela bahamba.

Njengoba emalanga achubeka, baphostoli bebaloku bashumayela ngaJesu, futsi bebelapha ngisho nalabagulako. Indzawo yonkhe kwasakateka kutsi baphostoli benta timangaliso. Loku kwabangela kutsi bantfu labasetindzaweni letakhelene neJerusalema, baletse bantfu labagulako kubo kuze batowelashwa. Baphristi baba nemona ngaloku, ngako baphindze bababamba babafaka ejele. Kodvwa baphostoli abahlalanga sikhatsi lesidze ejele.

Ebusuku ingilosi yaNkulunkulu yavula umnyango welijele, njengoba uyibona kulesitfombe. Yatsi kubo: ‘Hambani niye ethempelini, nichubeke nifundzisa bantfu.’ Baholi benkholo batfumela bantfu ngakusasa kutsi bayobuka baphostoli, kodvwa babatfola bangekho. Kwatsi ngemuva kwesikhatsi babakhandza ethempelini bafundzisa, babatsatsa babaletsa kubaphristi.

Labaholi benkholo batsi: ‘Siniyalisisile kutsi ningafundzisi ngeligama laJesu. Kodvwa asenibuke, senisakate lemfundziso yenu lonkhe laseJerusalema.’ Baphostoli bona batsi: “Kufanele silalele Nkulunkulu kunebantfu.” Ngako bachubeka bashumayela tindzaba letinhle. Akusiso yini sibonelo lesihle lesi natsi lesingasilandzela?