DORA hanu maraika akingwire orwigi rw’enkomo. Abasaija abarukusumu’ra bakwenda ba Yesu. Katuzoole akyabaletire kuba munkomo.

Harabireho akanya kake kuruga obu abegeswa ba Yesu baseswaho omwoyo ogurukwera. Kandi kinu nikyo kyabaireho: Mwihangwe limu, Petero na Yohana bakaba nibagenda mu yekaru mu Yerusalemu. Aho haihi n’orwigi, hali haroho omusaija ayabaire mulema obwomezibwe bwoona. Buli kiro abantu bamuletaga hanu nukwo asabirize sente h’abantu abarukwija mu yekaru. Obu yarozire Petero na Yohana, yabasaba bamuhe kyoona eki baine. Abakwenda baakukozire ki?

Bemerra kandi barolerra omusaija onu omunaku. Petero amugamba ati: ‘Tinyina sente, baitu ninyija kukuha ekinyina. Mwibara lya Yesu, imuka orubate!’ Nubwo Petero aimukya omusaija n’omukono gwe ogw’obulyo, kandi mubwangu aguruka kandi atandika kurubata. Abantu obu barora kinu, bahunirra kandi basemererwa habw’ekyamahano kinu ekirungi.

Petero agamba ati: ‘Tukozeseze amaani ga Ruhanga ayahumbwire Yesu mubafu kukora ekyamahano kinu.’ Petero na Yohana obu bakaba nibakyagamba, abamu h’abakuru b’edini baija. Babihirirwa Petero na Yohana habw’okuba nibagambira abantu ha kuhumbuurwa kwa Yesu kuruga mu bafu. Nahabwekyo babakwata babateeka mu nkomo.

Ekiro ekyagarukireho abakuru b’ediini batunga orukurato rukoto. Petero Yohana hamu n’omusaija ou baakirize baleetwa mu maiso gabu. Abakuru b’ediini babakaguza bati: ‘Mukozire ekyamahano kinu mu maani goha?’

Petero agamba ngu bakozeseze amaani ga Ruhanga ayahumbwire Yesu mubafu. Banyakatagara tibakumanya ekyokukora, habwokuba tibarukusobora kuhakana ngu ekyamahano kinu ekikuhuniriza kibaireho. Nahabwekyo barabura abakwenda obutagarukira kugamba hali Yesu omurundi ogundi, kandi babaleka bagenda.

Ebiro obu bihinguraho, abakwenda beyongera kutebeza hali Yesu kandi n’okukiza abarwaire. Amakuru agarukukwata ha by’amahano binu gakasasana. Kandi nubwo ebitebe by’abantu okuruga mubibuga ekwetorora Yerusalemu baleta abarwaire hali abakwenda kubakiza. Kinu kireetera abakuru b’ediini kukwatwa ihali, nukwo bakwata abakwenda n’okubateeka munkomo. Baitu bataikaleyo kasumi kakooto.

Mukiro maraika wa Ruhanga akingura omulyango gw’enkomo nkoku orukurora hanu. Maraika abagamba ati: ‘Mugende kandi mwemerre mu yekaru kandi mweyongere okutebeza abantu.’ Obu abakuru b’ediini batuma abasaija mu nkomo kutabarra abakwenda nyenkya kara ha kiro ekyakurasireho, basanga batarumu. Hanyuma basanga abakwenda nibegesa mu yekaru kandi babaleta mu kisiika ky’abakuru b’ebiragiro.

Abakuru b’ediini bagamba bati: ‘Tukaabaragira obutagaruka kwegesa hali Yesu, baitu mwijwize Yerusalemu n’okwegesa kwanyu.’ Abakwenda babagarukamu bati: ‘Tusemerire kuhuliriza Ruhanga kukira kuhurra abantu.’ Nahabwekyo, bo beyongera okwegesa ‘amakuru amarungi.’ Kinu tikiri kyokurorraho kirungi eki tusemerire kukuratira?