KITAA an anghel nga nag-abri han purtahan han prisohan. Iya ginpapagawas an mga apostol ni Jesus. Aton usisahon kon kay ano nga napriso hira.

Diri pa la maiha tikang nga iginbubo an baraan nga espiritu ha mga disipulo ni Jesus. Ngan ini an nahitabo: Usa ka kulop, hira Pedro ngan Juan tisulod ha templo ha Jerusalem. Didto, ha hirani han purtahan, may-ada tawo nga baldado tikang ha iya katawo. Kada adlaw gindadara hiya ngadto han mga tawo basi makilimos hin kwarta ha mga nasulod ha templo. Han nakita niya hira Pedro ngan Juan, nakilimos hiya ha ira. Ano an ira ginbuhat?

Inundang hira ngan ginkita an makalolooy nga tawo. ‘Waray ako kwarta, kondi ihahatag ko ha imo an aadi ha akon,’ siring ni Pedro. ‘Ha ngaran ni Jesus, buhát ngan lakat!’ Katapos, ginkaptan ni Pedro an too nga kamot han tawo, ngan linukso dayon ito ngan naglakat. Han nakita ini han mga tawo, nahipausa hira ngan nalipay gud hinin urusahon nga milagro.

‘Amon ginbuhat ini pinaagi han gahum han Dios, nga nagbanhaw kan Jesus,’ siring ni Pedro. Samtang nagyayakan hira Pedro ngan Juan, nagkaabot an iba nga lider han relihiyon. Nasina hira tungod kay ginsusumatan nira Pedro ngan Juan an mga tawo nga ginbanhaw hi Jesus. Salit ira iginpapriso hira.

Kinabuwasan, nagkatirok an mga lider han relihiyon. Ginpakadto nira hira Pedro ngan Juan upod an tawo nga ira gintambal. ‘Ha ano nga gahum ginbuhat niyo ini nga milagro?’ nagpakiana an mga lider han relihiyon.

Ginsumatan hira ni Pedro nga pinaagi ito han gahum han Dios, nga nagbanhaw kan Jesus. Diri maaram an mga saserdote kon ano an ira pagbubuhaton, kay diri hira makakagnigar nga nahitabo gud inin urusahon nga milagro. Salit ira ginsidngan an mga apostol nga diri na mag-istorya mahitungod kan Jesus, ngan ginpagawas hira.

Samtang nalabay an mga adlaw, padayon nga nagsangyaw an mga apostol mahitungod kan Jesus ngan nagtambal han magsakit. Nagsarang an mga sumat mahitungod hini nga mga milagro. Salit bisan an mga tawo ha mga bungto ha palibot han Jerusalem nagdara han magsakit basi tambalon han mga apostol. Tungod hini naawa an mga lider han relihiyon, salit ira iginpapriso an mga apostol. Kondi waray mag-iha didto an mga apostol.

Ha gab-i, gin-abrihan han anghel han Dios an purtahan han prisohan, sugad han nakikita mo dinhi. An anghel nagsiring: ‘Lakat ngan tukdaw kamo ha templo, ngan padayon nga tutdui an mga tawo.’ Pagkaaga, han nagsugo an mga lider han relihiyon hin kalalakin-an ngadto ha prisohan basi kuhaon an mga apostol, waray na hira didto. Hinkit-an hira nga nagtututdo ha templo ngan gindara hira ha katirokan han Sanhedrin.

‘Ginsidngan namon kamo nga diri na magtutdo mahitungod kan Jesus,’ siring han mga lider han relihiyon. ‘Kondi iyo ginpuno an Jerusalem han iyo katutdoan.’ An mga apostol binaton: ‘Kinahanglan sundon namon an Dios sugad nga magmarando imbes nga an mga tawo.’ Salit, nagpadayon hira ha pagtutdo han “maopay nga sumat.” Maopay ito nga susbaranan para ha aton, diri ba?