Tantara 106

Irô Nafaka Gadra

ZAHAVA baka anjely mitana varavaran̈a prizôn̈o io. Apostolin’i Jesosy lelahy aby aboakany io. Nan̈ino ma irô nigadra? Alô zahavatsika.

Ty raha niboaka, tsy ela tafaran’apostoly aby io nilatsahan’ny fan̈ahy masin̈y. Andra araiky, folakandra tamy zen̈y, Petera ndreky Jaona nandeha tamy tempoly ta Jerosalema. Narikitry varavaran̈a tempoly io, nisy lelahy nalemy rango izy mbala tan̈aty kibo. Isan’andra, nisy olo nitaondra izy tiô, beky izy mangataka vola amin’olo mandeha amy tempoly ao. Petera ndreky Jaona koa fa nandalo, izy nangataka tamin-drô. Karakôry hataon’apostoly aby io?

Irô nijanon̈o nizaha lelahy io. Petera nivolan̈a: ‘Zaho tsisy vola, fa zay raha misy aminakahy hamiako anao. Amin’an̈aran’i Jesosy, mitsangàna, mandihana!’ Petera koa fa nanambotro nangala tan̈ana lelahy io ankavanan̈a, izy tafitsangana, nahavita nandeha. Olo gaga sady ravoravo nahita izy nahavita nandeha.

Petera nivolan̈a: ‘Zan̈ahary namelon̈o Jesosy in̈y nan̈amia zahay angôvo nan̈anaovan̈a fahagagan̈a in̈y.’ Petera ndreky Jaona mbala mivolan̈a fo, mpitaondra fivavahan̈a sasany navy. Irô neloko, fôtony Petera ndreky Jaona nikoran̈a tamin’olo fa Jesosy natsangana tamy maty. Ke irô nisambôrin̈y, baka iô natao tamy prizôn̈o.

Amarain’izin̈y, mpitaondra fivavahan̈a aby io nan̈ano fivorian̈a natomboko. Petera ndreky Jaona, baka iô lelahy nitahan-drô in̈y nindesin̈y tan̈y. Mpitaondra fivavahan̈a aby io nan̈ontany: ‘Azôvy ma nan̈amia anarô angôvo nan̈anaovan̈a fahagagan̈a io?’

Petera nivolan̈a fa angôvo boaka amy Zan̈ahary namelon̈o Jesosy in̈y. Tsy hain-drô mpisôron̈o aby io raha atao, fôtony fahagagan̈a zen̈y nisy ankitin̈y. Ke irô nampitandrin̈y apostoly aby io fa tsy mahazo mivolan̈a mikasiky Jesosy zen̈y eky. Irô amy zay navôsotron-drô.

Apostoly aby io mbala nan̈ambara mikasiky Jesosy ndreky nampahivan̈a olo fo. Nalaza fahagagan̈a nataon-drô io. Nata olo boaka amy tanàna marikitry Jerosalema navy koa, nitaondra olo marary tamin’apostoly aby io. Mpitaondra fivavahan̈a aby io nafana fô, ke apostoly aby io nisambôrin-drô, baka iô nigadrain-drô. Irô tsy nahadin̈y ela tan̈y.

Hitanao amy sary io, koa fa alin̈y andra, nisy anjelin’ny Zan̈ahary nan̈abian̈a varavaran̈a prizôn̈o. Anjely io nivolan̈a: ‘Miboaha, mindao amy tempoly an̈y. Kaza vôly mitory amin’olo.’ Kiakan’izin̈y, mpitaondra fivavahan̈a aby io nan̈iraka lelahy maromaro hangala apostoly aby io tamy prizôn̈o tan̈y. Irô koa fa navy tan̈y, apostoly aby io fa tsy tao. Tsy elan’izin̈y, lelahy aby in̈y nahita irô nampianatra tamy tempoly tao, ke irô nindesin-drô tamy Fitsaran̈a Avo.

Mpitaondra fivavahan̈a aby io nivolan̈a: ‘Zahay fa nivolan̈a mazava taminarô fa tsy mahazo mikoran̈a Jesosy zen̈y. Zahava Jerosalema ty fa tsisy tsy nahay raha nampianarinarô.’ Apostoly aby io amy zay nivolan̈a: ‘Volan̈a Zan̈ahary fo araihanay, fa tsy volan̈an’olo.’ Irô baka tiô mbala nampianatra “vaovao tsara” fo. Tsara araihan̈a raha nataon-drô zen̈y, sa karakôry?

Asan’ny Apostoly toko faha-3 ziska toko faha-5.