ALILOLE lilayikali apano lili mkuwugula litanga lya m’nyumba ja ukayidi. Ŵandu ŵakwakoposya m’nyumba ja ukayidijo ali ŵandumetume ŵa Yesu. Kwende tulole yayatendekasisye kuti asimanikwe m’nyumba ja ukayidi.

Pagambile kupita kandaŵi kamnono ŵakulijiganya ŵa Yesu cipocelele msimu weswela. Sambano pakutendekwa ayi: Petulo ni Yohane musi wine akwawula ku nyumba jakulambilila ku Yelusalemu. Kweleko, ciŵandika litanga, patamaga mundu juŵaŵele jwamlemale umi wakwe wosope. Ŵandu ŵamjigalilaga pamalo gelega lisiku lililyose kuti aŵendeje mbiya kwa ŵandu ŵaŵajinjilaga m’nyumba ja kulambilila. Pam’weni Petulo ni Yohane, jwalakwe akwaŵenda kuti ampe kanekakwe. Ana ŵandumetumeŵa catende cici?

Jemanjaji akwima ni kumlolecesya mundu jwakulagaju. Petulo akuŵeceta kuti: ‘Mbiya nganingola, nambo cinampe cindu cangwete. Mlina lya Yesu jimani mjende!’ Kaneko Petulo akumkamula mundu jula pamkono wa kumlyo, mwandaŵi jimo jwalakwe akusumba ni kutanda kwenda. Ŵandu pakuyiwona yeleyi, akusimonga ni kusangalala ligongo lya cakusimonjesyaci.

Petulo akuŵeceta kuti: ‘Lili ligongo lya macili ga Mlungu, jwele juŵamjimwisye Yesu ku ŵawe.’ Jwalakwe ni Yohane pakwendelecela kuŵeceta, acimlongola ŵa dini ŵane akwisa. Jemanjaji atumbile ligongo Petulo ni Yohane akwasalila ŵandu kuti Yesu amjimwisye ku ŵawe. M’yoyo akwakamula nikwaŵika mu ukayidi.

Lisiku lyakuyicisya acimlongola ŵa dini ŵala akwete msongano wekulungwa. Akum’ŵilasya Petulo ni Yohane, yimpepe ni mundu juŵamposisye jula. Acimlongola ŵa diniwo akuwusya kuti: ‘Atesile yeleyi mwa macili ga nduni?

Petulo akwasalila kuti mwa macili ga Mlungu, juŵamjimwisye Yesu ku ŵawe. Ŵambopesi ngakumanyilila yakuti atende ligongo jemanjaji ngaŵa mkukana kuti cakusimonjesyaci citendekwe. Sambano jemanjaji akwasalila ŵandumetumewo kuti akasaŵecetasoni yakwamba Yesu, ni kaneko akwakunda kutyoka.

Masiku pagakupita ŵandumetumewo akwendelecela kulalicila pakwamba ya Yesu ni kuposya ŵakulwala. Ngani jakwamba yakusimonjesyayi jikuwanda. Nambosoni makuga ga ŵandu kutyocela m’misinda jakusungulila Yelusalemu gakwisa nawo ŵakulwala kwa ŵandumetumewo kuti ŵaposye. Yeleyi yikwatendekasya jelasi acimlongola ŵa dini, m’yoyo akwakamula ŵandumetumewo ni kwawugalila m’nyumba ja ukayidi. Nambo jemanjaji ngakutamamo kwandaŵi jelewu.

Sikati ja cilo lilayika lya Mlungu likuwugula litanga lya m’nyumba ja ukayidi, mpela mwakuyiwonela apano. Lilayikalyo likuŵeceta kuti: ‘Ajawule ku nyumba jakulambilila, soni akajendelecele kuŵeceta kwa ŵandu.’ Pakwacele, acimlongola ŵa dini paŵatumisye ŵandu ku nyumba ja ukayidijo kuti akajigale ŵandumetume ŵala, ngakwasimanamo.Kaneko acalumewo akwasimana ŵandumetume ŵala ali mkwiganya m’nyumba jakulambilila, ni akwajigalila ku nganya ja magambo ja Ayuda.

Acimlongolaŵa akuŵeceta kuti: ‘Twamlamulile kuti mkasimjiganyasoni yakwamba Yesu. Nambo mgumbesye mu Yelusalemu ni yijiganyo yenu.’ Kaneko ŵandumetumewo akwanga kuti: ‘Tukusosekwa kumpikanila Mlungu mpela jwakulamula kupundana ni ŵandu.’ Sambano jemanjajo akwendelecela kwiganya “utenga wambone.” Ana celeci nganiciŵa cisyasyo cambone cakuti m’weji tucikuyeje?