ILAWIL le ángel u jeʼekʼatma u joonai le cárceloʼ. Táan u jóoʼsik u apóstoloʼob Jesús. Koʼox ilik baʼaxten oksaʼaboʼob cárcel.

Maʼ jach úuch weʼekek le kiliʼich muukʼ tu yóokʼol le j-kaambaloʼoboʼ, ka úuch lelaʼ: Upʼéel u kʼiinileʼ Pedro yéetel Juaneʼ binoʼob teʼ templo yaan Jerusalén táan u chíinil kʼiinoʼ. Tu joonai le templooʼ tiaʼan utúul máak sijnal móoch yookiʼ, sáamsamal u bisaʼal u kʼáat u caridad tiʼe máakoʼob ku yookloʼoboʼ. Tu kʼáataj xan u caridad tiʼ Pedro yéetel Juan. ¿Baʼax a tuklik tu beetoʼob?

Ka jeʼeloʼobeʼ Pedroeʼ tiaʼalaj: Taakʼineʼ minaʼanten, baʼaleʼ yaan in tsʼáaiktech le baʼax yantenoʼ. ¡Tu kʼaabaʼ Jesús kin waʼaliktecheʼ, líikʼen, xíimbalnen! Machaʼab tu x-noʼoj kʼab tumen Pedroeʼ ka líikʼeʼ ka joʼopʼ u xíimbal. Lelaʼ tu beetaj u jaʼakʼal u yóol yéetel u jach kiʼimaktal u yóol le máakoʼoboʼ.

Pedroeʼ tiaʼalaj: Le milagroaʼ yéetel u páajtalil Dios t-beetaj, le máax kaʼa kuxkíint Jesusoʼ. Le táan túun u tʼaanoʼob Pedro yéetel Juanoʼ kʼuch le j-kʼiinoʼoboʼ. Jach kʼuuxilnajaʼanoʼob tumen Pedro yéetel Juaneʼ táan u tsikbalkoʼob tsʼoʼok u kaʼa kuxkíintaʼal Jesús. Ka túun beetaʼab u kʼalaʼaloʼob cárcel tumen le j-kʼiinoʼobaʼ.

Ka sáaschaj tuláakʼ kʼiineʼ, le j-kʼiinoʼoboʼ tu muchʼubaʼob, tu táanoʼob túuneʼ taasaʼab Pedro, Juan yéetel le máak tsʼakaʼabeʼ. Ka kʼáataʼabtiʼob: ¿Yéetel baʼax páajtalil ta tsʼakeʼex le máakaʼ?

Pedroeʼ tu núukaj: Yéetel u páajtalil Dios, le máax kaʼa kuxkíint Jesuseʼ. Le j-kʼiinoʼob túunoʼ maʼ tu kaxtaj baʼax u beetoʼobiʼ, tumen yojloʼobeʼ upʼéel milagro le baʼax tsʼoʼok u yúuchloʼ. Ka túun tiaʼaloʼob tiʼe apóstoloʼob ka u xul u kaʼansajoʼob tu kʼaabaʼ Jesusoʼ, ka tsʼoʼokeʼ ka jáalkʼabtaʼaboʼob.

Tak tsʼoʼok u máan yaʼab kʼiinoʼobeʼ, le apóstoloʼoboʼ láayliʼ táan u tʼaanoʼob tiʼ Jesuseʼ yéetel maʼ xuʼul xan u tsʼakkoʼob le kʼojaʼanoʼoboʼ. U tsikbalil le baʼax tu beetoʼobaʼ yaʼab tuʼux ojéeltaʼabi. Le beetik le máaxoʼob kajaʼanoʼob naatsʼ tiʼ Jerusalenoʼ tu taasoʼob u kʼojaʼanoʼob utiaʼal tsʼakbil tumen le apóstoloʼoboʼ. Yoʼolal lelaʼ maas kʼuuxilnaj le j-kʼiinoʼoboʼ ka túun tu kaʼa kʼaloʼob le apóstoloʼoboʼ. Baʼaleʼ yaan uláakʼ baʼax úuchi.

Tu áakʼabileʼ, jóoʼsaʼaboʼob tumen u ángel Dios, jeʼex a wilik teʼelaʼ. Le ángeloʼ tiaʼalajtiʼob: Xeeneʼex teʼ templooʼ ka chʼaʼajoʼolteʼex a kaʼanskeʼex le maʼalob péektsil tiʼe máakoʼoboʼ. Ka sáaschajeʼ le j-kʼiinoʼoboʼ tu túuxtoʼob chʼaʼabil le apóstoloʼob teʼ cárceloʼ, baʼaleʼ minaʼanoʼobiʼ. Teʼ templo kaxtaʼaboʼoboʼ ka bisaʼaboʼob teʼ Sanedrinoʼ.

Le j-kʼiinoʼoboʼ tiaʼaloʼob: T-aʼalajteʼex ka xul a kaʼansajeʼex tu kʼaabaʼ Jesús, baʼaleʼ tsʼoʼok a chupkeʼex Jerusalén yéetel a kaʼansajeʼex. Le apóstoloʼoboʼ tiaʼaloʼob: Unaj k-uʼuyik u tʼaan Dios, maʼ u tʼaan máakoʼobiʼ. Letiʼob túuneʼ maʼ xuʼul u kʼaʼaytajoʼobiʼ. ¡Jach bey xan kʼaʼabéet k-beetkeʼexoʼ!