SRAN nga ɔ koto wa yɛ’n, be flɛ i Etiɛni. Ɔ ti Zezi i sɔnnzɔnfuɛ kpa kun. Sanngɛ amun nian like nga be su yo i siɛn’n! Sran ngalɛ’m be su fa yɛbuɛ dandan wie’m be finfin i. ?Ngue ti yɛ be kpɔ Etiɛni dan sɔ lele mɔ be yo i sa kain sɔ’n niɔn? Amun e nian sa ti mɔ be yo i sɔ’n.

Ɲanmiɛn maan Etiɛni yoli abonuan sa mun. I sɔ’n timan sran wie’m be klun su, ɔ maan nanwlɛ ndɛ nga Etiɛni kan kle sran mun’n, be nin i be sili su akplowa. Sanngɛ Ɲanmiɛn mannin Etiɛni i ngwlɛlɛ yɛ ɔ yiyili nun weiin kɛ i kpɔfuɛ’m be kle gblɛ like. I sɔ’n kunnin be ya dan kpa. I sɔ’n ti’n, be trɛli i yɛ be seli nvlefuɛ mun kɛ be wa tɔn i suɛn.

Ɲanmiɛn ɲrun jranfuɛ’m be su kpɛn’n usɛli i kɛ: ‘?Sa sɔ’n yoli sɔ sakpa?’ Biblu’n nun ndɛ’n yɛ Etiɛni fa tɛli i kosan’n su klanman ɔn. I atabo’n su’n, ɔ kannin wafa nga sran tɛ’m be fa kpɔli Zoova i nuan ijɔfuɛ mun m’ɔ finman andɛ’n, i ndɛ. Kpɛkun, ɔ ukali su kɛ: ‘Amun ti kɛ sran sɔ mun sa. Amun kunnin Zezi m’ɔ ti Ɲanmiɛn i sufuɛ’n, yɛ amun a faman Ɲanmiɛn i mmla’n su.’

I sɔ’n yoli Ɲanmiɛn ɲrun jranfuɛ mun, ɔ nin mmla klefuɛ mun, ɔ nin Sadisefuɛ mun be ya dan kpa! Be trili. Sanngɛ Etiɛni mɛnnin i ti’n su yɛ ɔ seli kɛ: ‘An nian! N wun ɲanmiɛn su lɔ kɛ ɔ ti tikewa, yɛ Zezi jin Ɲanmiɛn i fama su.’ I sɔ’n ti’n, be tanninnin be su’n, be kpannin kekle kpa, yɛ be kwlaa be tɔli Etiɛni su ɔ. Be trɛli i yɛ be cuɛnnin ɔli klɔ’n i sin lɔ ɔ.

Klɔ’n i sin lɔ’n, be yili be tralɛ’n mannin gbanflɛn kun kɛ ɔ tra nun. Be flɛ i Sɔlu. ?An wun i? Kpɛkun yɛ be wie’m be wa finfinnin Etiɛni i yɛbuɛ ɔ. Etiɛni kotoli, kɛ nga amun fa wun i wa’n sa, ɔ srɛ Ɲanmiɛn se kɛ: ‘Zoova, sa nga be yo min yɛ’n, nán fa sie ɔ klun.’ Ɔ si kɛ Ɲanmiɛn ɲrun jranfuɛ mun, ɔ nin mmla klefuɛ mun, ɔ nin Sadisefuɛ mun yɛ be wlawlali sran sɔ mun ɔn. I sin’n, yɛ Etiɛni wuli ɔ.

?Sɛ sran kun yo amun sa tɛ’n, amún yó i wie, annzɛ amún sé Ɲanmiɛn kɛ ɔ yo i wie? Etiɛni nin Zezi b’a yomɛn i sɔ. Be nga bɔbɔ mɔ be yoli be sa tɛ’n, be liɛ’n be yoli be aklunye. Maan e mian e ɲin e fa be ajalɛ’n su.