MAN ya we i stap nildaon, hemia Steven. Hem i wan gudfala disaepol blong Jisas. ?Be ol man ya oli stap mekem wanem long Steven? Oli stap stonem hem long ol bigbigfala ston. ?From wanem oli agensem Steven olsem? Bambae yumi luk.

God i givhan long Steven blong mekem ol bigbigfala merikel. From samting ya, ol man ya oli no laekem hem, ale oli rao long hem long saed blong trutok we hem i stap tijim ol man long hem. Be God i givim bigfala waes long Steven, nao hem i pruvum se ol tijing blong olgeta ya, oli giaman nomo. Ale, olgeta oli kros moa, oli holem hem, mo oli singaot sam man oli kam blong talemaot ol giaman poen agens long hem.

Hae pris i askem long Steven se: ‘?Olsem wanem? ?Tok ya i tru?’ Blong ansa long hem, Steven i talemaot ol gudfala toktok blong Baebol. Long en blong toktok blong hem, hem i talem se ol man nogud long taem bifo, oli bin agensem ol profet blong Jeova tu. Nao hem i se: ‘Yufala i sem mak olsem ol man nogud ya. Yufala i kilim Jisas i ded, man ya we i mekem wok blong God. Mo yufala i no obei long ol loa blong God nating.’

!Ol tok ya i stikim ol lida blong skul, nao oli kros tumas we oli stap kakae tut blong olgeta from! Be Steven i lukluk i go antap long heven, i talem se: ‘!Yufala i luk! Mi mi luk we heven i open, mo we Jisas i stap stanap long raet saed blong God.’ Taem ol man oli harem tok ya, oli blokem sora blong olgeta, nao wantaem nomo, olgeta evriwan oli resis, oli kam long Steven. Oli holem hem, mo oli tekem hem i go afsaed long taon.

Long ples ya, oli tekemaot kot blong olgeta, oli givim long wan yang man we nem blong hem Sol. ?Yu yu luk Sol long pija ya? Nao oli stonem Steven. Steven i nildaon, i prea long God se: ‘Jeova, plis yu no makem sin ya blong olgeta, yu no panisim olgeta.’ Steven i save se ol lida blong skul oli trikim ol man ya. Nao biaen, Steven i ded.

?Taem wan man i mekem i nogud long yu, yu yu mekem i nogud long hem bakegen? ?Yu yu askem long God blong panisim hem? Steven mo Jisas i no mekem olsem. Tufala i soem kaen fasin long olgeta man, mo long olgeta tu we oli mekem i nogud long tufala. I gud yumi traem folem eksampol blong tufala ya.

Ol Wok 6:8-15; 7:1-60.