Lounwen Esütéban
Abahüdaguni 107
Lounwen Esütéban
ESÜTÉBAN wügüri le hudugubei. Aban lani Hesusu disipulu le úaraguati. Gama lumoun arihabei katei lan asuseredubei! Hachamuraguña wügüriña ha dübü wéiriti luagun. Ka san uagu wéiri lubéi liyereegun Esütéban houn lun hadügüni katei le lun? Ariha waméi.
Íderagua lumuti Bungiu Esütéban adüga milaguru buíduburiti. Mínsiñeti katei le houn wügüriña ha, asigenehatiñu luma ladüga larufudahani inarüni houn gürigia. Gama lumoun ruti Bungiu lichú aau lun Esütéban. Arufudahati Esütéban iyeeni lan le harufudahabei wügüriña ha. Ábatima hagañidun wügüriña hagía, ábati hárügüdüni aba giñe hagúarun houn wügüriña lun hariñagun iyeeni luagu.
Aba lálügüdüni fádiri le íñutimabei: ‘Inarüni san katei le hariñagubei?’ Aba lóunabun Esütéban lau aban yanu buiti tídangiñeti Bíbülia. Lidan lagumuchuni yanu ariñagati luagu iyereegutiñu lan meha profetagu lani Bungiu houn wügüriña wuribatiña. Ariñagati: ‘Ítara hiña kei hagía. Aba háfaruni Hesusu hilagubei, le lúbuein Bungiu, ani mídintün lau lilurudun Bungiu.’
Aba hagañidun hábutigu huríu saragu! Aba lakünrinhan hari le hagañi lun. Aba larihin Esütéban sielun aba lariñagun: ‘Ariha humá! Narihiñein Hesusu rara luéigiñe lóunwenren Bungiu sielu,’ aba hadouruni wügüriña ha harigei aba hayabin luagun. Ábati hasagaruni uburugugiñe.
Aba hagidarunu hadaüragun aba hígirunu lábugiñe laríaahan aban nibureinti gíriti Saulu. Ariha bumuti san Saulu lidan dibuhu? Ábati hachamuragun dübü luagun Esütéban. Aba láhuduragun, kei barihini, aba lafurieidun lun Bungiu: ‘Heowá, míchigaba duru hawagun luéigiñe figóu le.’ Subudi lumuti Esütéban añahein lan hádangiñe gürigia ha yéedagua hamutiñu hábutigu huríu. Lárigiñe aba lounwen.
Dan le ladügün somu gürigia aban katei wuribati bun, fayei bumuti san lau ligía meme, o amuriahatibu lun Bungiu lun ladügün somu dañu lun? Ni Esütéban ni Hesusu madügün hamuti katei le. Buidutiña meha íbini hama ha furundetiñu hama. Houcha wamá lun wáyeihani katei le.
